Home Infrastructura A pone stop definitivo na cobamento di santo y piedra den area...

A pone stop definitivo na cobamento di santo y piedra den area di Sero Cristal

52
0
SHARE
- Advertisement -

DIP, Directie Natuur en Milieu y City Inspector lo hiba control stricto

ORANJESTAD (AAN):  Minister Oduber a yama un conferencia di prensa diaranzon mainta pa asina informa cu pa loke ta trata e trabaonan y maneho relaciona cu cobamento di santo y piedra na Aruba, cu el a tuma nota di e declaracion cu tabata tin di e Comision Salba Sero Cristal.

E mandatario a indica cu manera semper, a atende cu e grupo aki na un forma responsabel. Gobierno a trece dilanti na diferente ocasion, for di algun luna caba c ta bezig pa atende cu un problema cu tey pa mas di 20 pa 30 aña di trabaonan di cobamento cu ta tuma lugar na e area aki y e maneho pa otro areanan.

El a agrega cu den e caso di Sero Cristal y Babijn, ta asina cu for di aña pasa caba a atende na varios ocasion cu esnan cu tabata desaroya nan ofishi den e area aki. Ta trata di tres compania cu tabata opera na e area. Tin di nan cobando santo, tin di nan kibrando piedra, otronan trahando concreto, bloki, etc.

Desde aña pasa a notifica e companianan aki cu e trabao cu nan ta realizando eynan no ta cuadra cu e maneho cu gobierno tin ni tampoco cu e leynan cu tin na vigor na e momentonan aki, Oduber a enfatiza.

Pa medio di e ROP, ta determina cu e area aki specificamente ta un area berde cu ta wordo conserva y preserva.

Despues di hopi aña di no a atende y contesta e hendenan ariba nan hindervergunning, Minister di Husticia y su persona a contesta nan y mustra nan ariba e hecho cu nan no lo haya un hindervergunning pa sigui traha den e area aki.

Na December 2018 a anuncia tambe cu fase di transicion pa tur loke ta cobamento di santo y tera aki na Aruba di dos aña. Kiermen, no ta un cuestion cu ta par’e otro siman of cu manera cu a scucha cu tabata tin intencion cierto momento di cierto companianan di bay dobel y te hasta triplifica nan prijs, a base supuestamente di e decision di gobierno.

E mandatario a sigui splica cu den forma cla a mustra ariba e hecho cu ta dunando suficiente tempo (dos aña) y ta dia 1 di Januari 2021 cu e maneho di gobierno ta cu no lo permiti pa e cobamentonan aki sigui tuma lugar pasobra nan ta contra ley.

E trabaonan aki ta un peliger, ta contra salud y ta contra medio ambiente, e minister a remarca.

Segun Oduber, diamars el a firma e vergunning caminda cu ta nenga e existencia di e posibilidad pa un rosamento cu mester tuma lugar, cu ta significa cu e operacionnan di CalaRomana na e sitio aki ta bira imposibel.

Diaranzon e carta aki lo mester a wordo entrega pa mustra cu di inmediato nan mester para tur loke ta trata e actividadnan eyriba pasobra nan ta contra ley.

Minister Oduber a bisa cu Bureau City Inspector hunto cu Directie Natuur en Milieu y DIP lo percura pa un control severo tuma lugar pa evita cu esaki ta continua.

El a laga sa cu personalmente el a reuni cu tur tres compania y a sinti cu den e caso di Cala Romana tabata tin un bon comprondimento, caminda cu gobierno a ofrece tur tres un otro alternativa pa loke ta trata tereno y operacion.

Den e ROP a identifica Barcadera como e zona industrial caminda cu e tipo di trabonan aki por tuma lugar. Ainda siman pasa tabata tin reunionnan entre Cala Romana y DIP caminda cu no ta caba di contesta gobierno di kico ta e intencionnan cu nan tin.

Pesey a tuma un decision definitivo abase di e afwijzing cu a tuma lugar cu desde diaranzon 8 di Mei, City Inspector ta carga e liderazgo pa hunto cu DIP y DNM percura pa ningun actividad tuma lugar.

Den caso cu esaki no sosode lo implementa boetnan (cu por bay te hasta 10 mil florin) y hunto cu Cuerpo di Polis lo tuma e accionnan necesario pa para algo cu ya caba for di basta dia tabata basta tolerante, desde cu a nenga hende e vergunning y mester a para e actividadnan aki, pero tog e actividadnan a continua, Oduber a indica.

Pa loke ta trata e otro dos companianan, e compania Bess, ya caba for di aña pasa a para tur actividad na e area na Babijn.  A ofrece nan tereno na Barcadera den caso cu nan kier sigui cu e negoshi aki.

E di tres compania, Caribbean Beton, tabata a duna sosten desde e momento cu a acerca nan. Nan tambe a haya tereno na Barcadera. E siman aki nan ta mudando tur nan ekiponan. Nan a tarda un tiki mas. Luna pasa tabata e luna cu nan mester a muda, pero e propietarionan a confirma cu for di siman pasa full e planta di traha beton a wordo muda pa Barcadera, Minister Oduber a finaliza bisando pa loke ta trata Sero Cristal.

- Advertisement -

DUNA COMENTARIO

Please enter your comment!
Please enter your name here