Prome Minister Evelyn Wever-Croes
ORANJESTAD (AAN): Prome Minister tambe a elabora riba crisis migratorio di Venezuela y tema di asilo, e siman aki nan tabatin un conferencia di prensa hunto cu Minister di Husticia riba e punto aki. Minister di Husticia a bay Parlamento riba diahuebs pa duna nan mas informacion riba e tema aki, pasobra esaki tin un prioridad hopi grandi.
E impacto di e crisis migratorio di Venezuela riba Aruba ta grandi, segun Prome Minister. Na ningun momento nan a purba di sconde esaki. Aruba tin miles di persona cu a bin di Venezuela na un forma no legal, y nan mester atende cu esey. Den ultimo dos siman tabatin e tema di asilo cu a bin dilanti, cu a hala hopi atencion. Prome Minister a bisa cu duna un update relaciona cu e caso cu mester a wordo trata den Corte riba diabierna, cu a wordo entama pa un grupo di persona cu a pidi asilo, na unda nan a cuminsa un procedimento sumario pa nan por keda na Aruba y nan a pidi acerca pa nan haya vivienda, gastonan medico cubri, school pa nan yiunan y oportunidad pa traha.
Nan a studia e caso al fondo, e grupo aki, atravez di nan abogado a demanda no solamente pais Aruba pero pais Hulanda. Nan a traha hunto cu abogadonan di pais Hulanda y nan a yega na conclusion cu Aruba ta para hopi fuerte den e caso aki, pasobra nos tin un maneho riba tereno di asilo, y e maneho aki ta basa riba tratadonan internacional y Aruba ta cumpliendo cu exigencianan di e tratado cu Aruba ta forma parti di dje. E maneho ta indica claramente ken si por haya asilo y ken no por haya asilo. Esnan cu si haya asilo, ta haya e proteccion cu e tratado ta stipula, esnan cu no por haya asilo, no ta haya e proteccion y no por keda Aruba tampoco, pasobra nan no tin un base legal.
Prome Minister a enfatiza cu Aruba no ta de crisis, Aruba tin un estado democratico, nos leynan y nos reglanan ta aplicable, kiermen ta un persona cu a pidi asilo keda Aruba, nan mester tin un permiso, sin esaki nan no por keda Aruba.
A base di e maneho aki, cu nan no a trah’e nan so, nan a haya asistencia di Hulanda, pasobra nan tin hopi mas experiencia cu nos riba tereno di asilo. E ta un maneho cu nan a haya tres veredicto den Corte sumario e siman aki cu e maneho a wordo aproba door di Corte den e casonan sumario. Ta trata di personanan cu a bin Aruba na aña 2017 y a pidi un permiso pa traha, na 2018 nan permiso a vence, nan no a bay bek nan pais y na 2019 nan a pidi asilo.
E tratado no ta traha asina, segun e mandatario, una bez cu ya bo ta na e pais hopi tempo e ora bo por pidi asilo. E persona a perde su caso, y asina tin mas ehempelnan di casonan individual cu Corte a duna gobierno razon. Kiermen nan ta mira cu e maneho cu nan stipula ta wordo aproba pa Corte.
Pa loke ta trata e caso cu a hala hopi atencion, di e personanan cu a pidi pa vivienda, gastonan medico cubri, school pa nan yiunan y oportunidad pa trabao, Prome Minister a bisa cu nan mes a hala atras ora nan a ripara cu e caso no tabata suficientemente fuerte pa un caso sumario. Nan a indica cu posiblemente nan lo bin cu un bodemprocedure y esey lo tarda, pero e caso sumario mes no lo sigui bay dilanti.
Prome Minister a enfatiza un biaha mas cu ta trata di un tema hopi delicado y complica. E ta un tema cu ta tuma hopi tempo, tanto di Minister di Husticia, como di su mes, pa nan ta sigur cu nan ta tuma tur interes den consideracion. Con cu bay bin, Venezuela ta pasando den momentonan hopi dificil, y ora un persona bin bati na bo porta pa ayudo, nos como bon Arubiano semper ta habri nos curazon y porta di nos cas pa purba yuda. Nan maneho a keda asina, pasobra esey ta e Aruba cu tur conoce, e Aruba cu nos tur ta stima. Pero ta sumamente importante ta considera te na unda nos por yuda y esey ta e punto actual. Prome Minister a bisa tur dia y tur caso ta un dilema y cada caso mester wordo mira riba su mesun meritonan, y mester di tempo y atencion pa atende cu cada un di nan.
