ORANJESTAD (AAN): Directora di Aruba Trade & Industry Association (ATIA) a duna di conoce cu nan ta scucha entre nan miembronan cu “business ta slow” den cierto sectornan.
Michelle de Groot a indica cu esaki ta a consecuencia di e cambionan cu a wordo introduci den e reforma fiscal. Ainda no tin data ariba esey, pero por bisa cu ATIA ta sinti un incertidumbre bao di comercio ariba kico ta bay bin.
Gobierno a anuncia cu lo bin cambio den un di dos fase. Den e fase aki ta caminda e cambionan mas grandi lo bin pa comercio. Pero no tin claridad cual ta e cambionan ni ariba ki tempo e lo wordo introduci.
De Groot a remarca cu ta hopi importante pa comercio wordo avisa di adelanta pa por prepara pa e cambionan aki. ATIA ta ariba e tema aki di reforma fiscal y nan ta keda monitor e proceso.
A pidi un reunion atrobe cu Minister di Finanzas y Minister President pa haya mas claridad ariba esaki. A reitera cu nan ta sinti e incertidumbre bao di nan miembronan.
El a agrega cu door cu nan no sa kico ta e cambionan cu ta bay bin, ATIA no por bisa nada ariba con comercio ta atendiendo cu esaki.
Na momento cu nan sa mas kico ta e cambionan, nan recomendacionnan lo trece un alivio pa comercio. Ta na gobierno pa wak si nan ta introduci e recomendacionnan di e reforma fiscal na un manera cu ATIA a propone of ta bay otro rumbo. Nan no sa esey ainda, Michelle de Groot a manifesta.
E mesun preocupacionnan ta keda, a bisa, cu ta atrobe introduci algo pero informa na tempo. Esey ta loke ATIA ta pidi y pa sinta na mesa. Lo keda monitor esaki.
COMPETENCIA DESLEAL
Relaciona cu e competencia cu comercio online ta nifica y e hendenan cu ta bende productonan sin pasa impuestonan, De Groot a bisa cu loke ta FIOT, e no sa si esaki ta wordo cumpli.
E sa cu FIOT ta hopi activo ariba bay tras di negoshinan cu no ta yena aanslagbiljet. Ta wak hopi movecion ariba e area ey, a enfatiza.
Pa loke ta e companianan cu ta ariba Facebook, ATIA no sa si nan ta legal of ilegal. ATIA ta para pa esunnan cu si ta cumpli cu ley. Pa via di e negoshinan ilegal, esunnan cu si ta cumpli ta sufri y nan si ta contribui y ta cumpli cu nan obligacionnan fiscal, social, etc.
Michelle de Groot a indica cu e sa cu tin un problema cu ‘compliances’ y esaki ta algo cu Departamento di Impuesto mes ta duna di conoce y cu nan ta trahando ariba esaki.
ATIA a sinta un par di biaha cu DIMP y nan ta bezig ta atacando e problema aki y cu un reforma fiscal, esey lo yuda den esey tambe, a indica.
