ORANJESTAD (AAN) – Tur e comisionnan cu ta encarga cu e Aruba Health Fair cu AZV ta organizando, ta trahando duro riba e preparacion. Asina sra. Solange Tjong, Relacionista Publico di AZV a menciona den entrevista cu DIARIO.
Sra. Tjong a expresa cu AZV ta hopi satisfecho cu e acogida cu nan ta hayando, y sigur di parti di e sponsornan, pasobra sin nan colaboracion lo no por logra.
AZV kier a haci esaki cu budget natural, y tur cos ta bayendo den bon marcha. Hopi compania, entre nan banconan y otro companianan di seguro ta yudando cu e proyecto aki.
Sra. Tjong ta haci un yamada na comunidad pa corda cu Aruba Health Fair ta un feria di salud, y e lo tuma lugar Diasabra 8 di Juni di 4 or di atardi te 10 or di anochi.
El a reitera cu a scoge Diasabra pasobra hopi hende den nos comunidad ta liber y por saca tempo pa bishita e feria di salud aki. Manera ta conoci e ta tuma lugar na AZV mes na Rumbastraat 21.
Lo tin un escenario grandi unda lo tin bandanan musical presente, pero tambe lo tin diferente orado cu lo referi na varios tema y e ta invita tur hende pa scucha nan, pasobra ta hopi importante concientiza riba desaroyonan di Aruba su salud, y kico ta e plannan cu tin pa aki cinco aña. E enfoke mas grandi ta pa papia riba Aruba su situacion actual, y kico por spera aki cinco aña di AZV, Hospital, IMSAN, y tur otro partner dentro di e ramo di salud.
El a agrega cu e ticketnan di entrada ta disponible na AZV mes den siman riba oranan laboral. E costo ta hopi abao mes pa hacie mas accesible pa tur hende por participa. Tambe ta importante pa registra. Por activa esaki, despues di a cumpra e ticket riba AZV su website: azv.aw.
Registracion ta importante pasobra ora activa e ticket e persona por participa na haya premio, pero mas importante ta cu por participa den e tayernan di trabao cu lo tin disponible.
Tin un total di 12 tayer di trabao cu un cupo di 40 persona cada un. Pues mas lihe un persona registra mas garantia e tin di haya lugar.
Entre e cantidad di temanan cu lo bin dilanti, tin, entre otro: Cuido di herida, Diabetes, Prevencion, y incluso un tayer di trabao “Con pa siña cushina saludable”.
Sra. Tjong a reitera cu pa tur mucha bao di 16 aña e actividad ta gratis y nan por bin cu nan mayornan.
Tin actividadnan cu apoyo di IBISA y otro federacionnan deportivo cu tambe lo participa. Henter e edificio di AZV lo wordo transforma den un feria di salud y esaki ta e oportunidad, no solamente pa AZV yega mas cerca di e aseguradonan, pero pa e comunidad concientiza y educa su mes tocante loke ta cuido medico na Aruba y con nos por cuida nos salud.
