Home Economia Banco Central ta mustra cu tin crecemento economico pero riesgonan ta aumenta

Banco Central ta mustra cu tin crecemento economico pero riesgonan ta aumenta

154
0
SHARE
- Advertisement -

ORANJESTAD (AAN):   Banco Central di Aruba (BCA) a publica “State of the Economy” pa e prome tres trimesternan di 2018. E publicacion aki ta duna un synopsis di e desaroyonan economico local y internacional di e periodo aki. E puntonan mas importante relaciona cu e parti domestico ta presenta abou, incluyendo un resumen di e indicadornan economico principal.

Den e prome nuebe lunanan di 2018, e economia di Aruba a sigui presta mihor cu na 2017. Actividadnan den e sector turistico a aumenta bastante den e prome nuebe lunanan di 2018. E cantidad di turista a crece cu 1,5 porciento, mientras cu anochi hospeda a nota un resultado similar (+1,6 porciento). E sector hotelero a raporta un resultado solido den e prome nuebe lunanan di 2018. Mientras cu e ocupacion averahe di cambernan a conoce un aumento di 0,2 punto di porcentahe pa 85,6 porciento, e prijs averahe diario y e ingreso pa camber disponibel a mehora di un forma significante (+11,5 porciento y +11,7 porciento respectivamente). Entradanan for di turismo, raporta pa e banconan comercial, a resulta den un crecemento di 9,6 porciento den e periodo te cu september 2018.

Indicadornan di consumo tabata mixto den e prome nuebe lunanan di 2018. A observa entradanan mas halto for di BBO (+1,8 porciento incluyendo un coreccion pa e aumento den tarifa), como tambe for di impuesto di importacion (+14,3 porciento). Credito bancario na consumidornan tabata 3,4 porciento menos na september 2018 compara cu december 2017, indicando un bahada di consumo priva.

Indicadornan di inversion tambe a mustra patronchinan divergente. Tanto e cantidad como e balor di permisonan di construccion aproba a nota un bahada.

E desaroyo aki tabata atribui principalmente na dos proyecto grandi relata na turismo pa cual a duna permiso di construccion na 2017; no a concedi permiso pa proyecto di tal magnitud na 2018. Sinembargo, e dos proyectonan aki a contribui na inversionnan substancial durante 2018. E volumen di importacion total di cement a aumenta (+43,9 porciento) den e prome tres trimester di aña, mientras cu e suma total di hipoteca tanto pa vivienda como comercial tabatin un crecemento continuo, compara cu december 2017. E indice di percepcion di negoshi tabata relativamente pesimista den e di tres trimester di 2018.

E tasa di inflacion promedio anual tabata 2,3 porciento den september 2018, como cu un maneho fiscal mas preta a amplifica e efecto di prijsnan mas halto pa gasolin y cuminda. E introduccion di BAVP y e aumento di BAZV cu 1,0 punto di porcentahe na 3,0 porciento a causa un aumento den prijsnan. E asina yama “core inflation” tabata 1,2 porciento den september 2018. Pa prome biaha den tres aña, e tasa di cambio real di e florin vis-à-vis e dollar Mericano a subi den e di tres trimester di 2018. Esaki nifica cu

Aruba su posicion competitivo a deteriora den relacion cu Merca

Placa den circulacion a expande den e prome tres trimester di 2018 cu 3,2 porciento te na Afl. 4.373,8 miyon. E reservanan di divisa a crece cu Afl. 39,7 miyon, cual ta ensera cu e reservanan a keda na un nivel adecuado durante e prome tres trimester di 2018. Mester nota si cu e espacio entre e referencia y e tasa di cobertura ta bahando constantemente for di 2,7 luna den januari 2017 te na 1,8 luna den september 2018. Credito domestico extendi na e sector priva door di e sector bancario a subi pa Afl. 3.215,7 miyon na final di september 2018, un expansion di 2,6 porciento compara cu december 2017, cual ta e resultado di un expansion den hipotecanan pa construccion di cas (+6,1 porciento) y prestamo na negoshinan (+1,8 porciento), mientras cu a registra un bahada den credito na consumidornan (−3,4 porciento).

E deficit fiscal (“cash basis”) tabata Afl. 41,2 miyon pa e prome nuebe lunanan di 2018, un mehoracion di Afl. 99,9 miyon compara cu e mesun periodo den 2018. E resultado aki tabata impulsa pa un subida den entrada di impuesto y entrada no relata na impuesto, mientras cu gastonan di gobierno a mengua. E debe total di gobierno a yega Afl. 4.389,3 miyon, expandiendo cu Afl. 230,4 miyon.

E publicacion completo ta disponible riba BCA su website (www.cbaruba.org).

- Advertisement -

DUNA COMENTARIO

Please enter your comment!
Please enter your name here