ORANJESTAD (AAN): E fundacion conoci como “Basha Foundation” a wordo funda na Augustus 2016 door di Maria Silva-Hart (conoci tambe como e fundador di Vibration PR), Olga van Bochove y Eribert Delamare.
Basha a wordo funda cu e meta pa: (1) E desaroyo y sosten di pensamento creativo entre individuonan riba e isla di Aruba, e expresion y arte den tur forma di media, y principalmente arte di audio y visual, baile, y musica, y tambe poesia. (2) E desaroyo y maneho di un plataforma solido unda hendenan por promove nan desaroyo artistico y carera door di presenta cu nan mesun material dilanti publico. (3) Ofrece hende, specialmente hobennan e chens di participa den actividadnan inovativo, yen inspiracion y refrescante.
Basha Foundation ta pa hendenan cu ta buscando un medio pa creatividad y coneccion cu otro artistanan local. Basha ta ofrece un plataforma amplio pa habitantenan local pa comparti nan arte y creencia cu publico den un esfuerzo pa crea un lazo entre nan, y pa nan pasa momentonan inolvidable y un experiencia positivo. Basha ta inspira y encurasha tur artista pa adkiri conocemento y comparti nan talento cu mundo.
Cada pasa un luna, Basha ta organiza un “Poetry Night” cu e sosten di Prins Bernhard Fonds, cu diferente temanan manera: “Rant’s” en colaboracion cu MFA Paradera. “Marcus Garvey” en colaborcion cu We Culture, y mucho mas.
E aña aki ya caba nan a tene varios tema, manera “Shiver’s” en colaboracion cu Fireson Brewing Company, “A tribute to Frida Kahlo” en colaboracion cu Lola’s Taqueria, y awor ta preparando pa e di tercer Poetry Night di aña lo ta adicion di mucha na Cosecha.
Pa nan di decimo aniversario, Basha a presenta e prome Poetry Festival di Aruba cu awor a bira un evento anual conoci como “Poetry is an Island”. E evento a inclui hopi atraccion manera street fair pop-up, musica, bailarinnan di limbo, weganan interactivo, y tambe poesia.
