ORANJESTAD (AAN): Segun Benny Nisbet, kende ta lider di Partido PPA, nan a tuma nota cu Gobierno a haci e reapertura di e Oficina di Turismo na San Nicolas y tambe por a tende cu a anuncia un asina yama ‘Island Fest’ cu lo tuma over e actividad di Carubbian’ cu a worde para door di e actual gobierno pa mas cu un aña caba y tabata worde considera e unico actividad cu tabara atrae un cantidad minimo di turista semanalmente.
Realidad ta cu un actividad manera ‘Island Fest’ cu lo tuma lugar cada tanto siman NO por atrae e cantidad di turista cu San Nicolas mester locual e ‘Carubbian’ tampoco tabata logra pero a lo menos cu ‘Carubbian’ tabata semanalmente.
Awor e pregunta ta keda riba mesa: Kico San Nicolas mester pa forza un movimento di turista cu lo pasa tempo den Centro commercial/turistico di San Nicolas cu lo causa un inversion den proyecto pa e turista y tambe e necesidadnan local?
PPA lo purba contesta e pregunta aki un vez mas!! Den e articulo aki PPA ta pone e accento riba un desaroyo di Turismo/commercial y nos lo bin back riba otro desaroyo den otro articulo.
Segun Nisbet, San Nicolas merece un vision esta un ‘Masterplan’ cu ta reconoce e rol cu San Nicolas por hunga den un futuro cercano tanto riba tereno di Turismo como riba otro tereno cual lo diversifica e economia di San Nicolas y vecindario.
Te dia di awe PPA no a tuma nota cu ningun gobierno ni esun cu a caba di worde manda cas pa pueblo di Aruba (AVP!) Ni e gobierno actual NO a presenta un Masterplan conteniendo un vision como tal. Mayoria idea cu ta worde presenta ta mas tanto ideanan ‘ad hoc’ cu a tuma over diripiente!
SAN NICOLAS OUR CARIBBEAN TOWN:
PPA ta convenci pa hopi aña cu si usa e historia di San Nicolas como un ciudad cu tabatin un historia ‘multicultural’ pa usa esaki…den futuro esaki lo expande e producto Aruba positivamente.
Na prome lugar lo mester apunta ciertolugar cu turista lo por bishita pa medio di transportacion publico cuallugarnan gobierno mester garantisa na tur momento cu nan ta den un situacion bon a menos cu nan ta cay bow di un instancia priva.
P.e na SN gobierno lo por combersa cu e commission di Weg Sero Preto cu ta decora tur aña pa pascu pa mantene elugar ey den condicion(gobierno lo por yuda!) pa elugar ey por worde bishita pa turista. Por permiti un 3 of 4 artista.entrepreneur pa bende articulo (made in Aruba/SN) for di elugarnan ey. Gobierno por contribui dunando e grupo aki nan permisonan rapidamente!!
Gobierno por papia cu e instancia cu ta cay bow di Misa Katholico pa asina regla cu turistanan cu desea esaki lo por bishita elugar aki tambe na Weg Seroe Preto.
Gobierno lo por ‘upgrade’ e bunker na Juana Morto algo cu TUR gobierno a keda dejado pa haci pa hopi aña aki tambe ora cu e lugar worde drecha, gobierno por permiti un cantidad di artista/entrepreneur por bende nan articulonan/souvenir etc for di e lugar aki. Asina lo tin lugar tambe for di brug bay pariba cu merece atencion di parti di gobierno di Aruba.
TRANSPORTE PUBLICO PA TURISTA:
E idea di Nisbet, ta pa Gobierno of Ministro pone disponibel 12 of 15 vergunning O y T pa ciudadano cu ta desea di inicia un compania propio pa ofrece turista ‘Tour’ na e turista ‘strictamente’ parti pariba di nos Isla esta di brug pariba. Esnan cu lo ricibi e ‘vergunning’ aki lo worde permiti pa bay sea na e hotelnan of na nos haf pa busca nan clientenan pero nan Tour mag di tuma lugar parti p’ariba di nos Isla p.e. pariba di Spaans Lagoen etc.
Gobierno lo mester pone un condicion si, esta cu e vehiculo cu cual ta transporta e turista aki lo mester ta un vehiculo completamente turistico, por ehemplo un Bus bieu, un vehiculo bieu di brandweer, un trolley riba wheel etc etc y cu lo mag di haci propaganda riba e busnan aki pa negoshinan situa parti pariba di nos Isla.
Comprende bon: E vehiculonan turistico aki lo crea un ‘ambiente special’ ora nan ta move parti pariba di nos Isla y tur lo ricibi tambe e condicion cu nan lo mester pasa p.e. Un hora minimal cu nan clientenan den Centro Comercial/turistico di San Nicolas.
Si un vehiculo asina tin ‘seating capacity’ pa entre 40 persona y nan logra un capacidad di 70% cual ta p.e. 28 persona pa vehiculo esaki lo nifica cu diariamente lo tin 15 vez 28 cual lo tin 420 turista y algun compania kizas lo por logra dos tour pa dia. Esaki lo contribui cu ‘entrepreneur’ cu ta duda kico ta prome e ‘galinja of e webo’ lo por tuma decision Atardi pa Anochi lo por ofrece un TOUR di ‘The other side by night’ of ‘Meet the people”, etc.
