Home Hudicial Boet pa muher cu a maltrata otro despues di trabou pafor di...

Boet pa muher cu a maltrata otro despues di trabou pafor di hotel

198
0
SHARE
- Advertisement -

ORANJESTAD (AAN) – E muher P., a haya boet pa a maltrata un otro muher cu tabata traha cun’e na un hotel. Fiscal a bisa cu ta acusa e muher P. pa a maltrata Y. riba 27 Februari 2018. Fiscal a bisa Hues cu P. lo a dal Y. den cara.

PELEA ENTRE DOS DAMA

Hues a mustra cu na Polis P. a admiti. P. a mustra cu tabatin disputa cu e dama Y. na trabou cu a causa cu nan a kit’e. Segun P., e dama Y. a bay riba dje y dal’e y e ora ey P. a dal’e cu mokete. Esaki a sosode den parkinglot di hotel. Hues a bisa cu Y. a declara cu el a wordo ataca di lomba door di P. y e ora nan a bringa.

E manager di seguridad di e hotel a declara na Polis cu el a mira con P. a cana bay direccion di Y. cu tabata papiando cu un otro hende. P. a dal’e cu mokete na cabez y despues a surgi un pelea y el a bay para e pelea.

Hues a remarca cu e declaracionnan aki ta diferente cu loke P. ta bisa. P. a bisa Hues cu e motibo di tur e problema aki ta pasobra el a mira Y. ta entrega na turista un saco di plastic chikito cu contenido blanco y Y. a haya dollar.

Segun P., Y. a bay serca dje y bis’e cu e no a mira nada. P. a bisa cu no worry pasobra e no ta un chichi. El a bisa Hues cu promer cu e incidente aki, Y. tabata tira palabra p’e. P. a bisa Hues cu e ta kere cu Y. tabata jaloers riba dje. Tambe el a bisa Hues cu Polis a yega di sera Y. pa droga y arma di candela.

EXIGENCIA FISCAL

Fiscal a bisa Hues cu e ta haya legalmente proba cu P. a maltrata Y. Tin un declaracion medico cu Y. a wordo maltrata na cara. Fiscal a bisa Hues cu e ta considera esaki un maltrato simpel. Fiscal a exigi un boet di 500 florin y si P. no paga, e lo mester bay 10 dia sera.

  1. a bisa Hues cu e no ta haya husto loke Fiscal ta exigi. Na yoramento el a bisa cu ta inhusto cu door cu Y., el a perde su trabou y awor e ta haya castigo.

SENTENCIA

Hues a sera tratamento di e caso y a dicta sentencia di biaha. Hues a bisa cu e ta haya legalmente proba cu P. a dal Y. Hues a bisa cu e no ta kere cu P. a defende su mes, manera P. ta bisa.

Hues a mustra cu un miembro di seguridad a bisa cu el a mira P. a bay dal Y. Pa cu e castigo, Hues a bisa cu e ta tene cuenta cu e circumstancia cu tabatin problema entre e dos damanan. Hues no a bay di acuerdo cu e exigencia di Fiscal.

Hues a condena P. na un boet di 500 florin di cual 200 florin ta condicional. E 300 florin di boet, Hues a bisa cu P. lo por paga esaki den tres pago. Si P. no paga e 300 florin, e lo mester bay 6 dia sera.

 

- Advertisement -

DUNA COMENTARIO

Please enter your comment!
Please enter your name here