ORANJESTAD (AAN): Campeonato Heineken fast pitch di Aruba Softball Bond a inicia den luna di Mei riba veld di Kudawecha. Tur aña Aruba Softball Bond ta reconose y dedica dicho campeonato na baluartenan cu a destaca den mundo di deporte y mas cu klaro a hunga den campeonatonan di Aruba Softball Bond.
E aña aki campeonato 2019 ta worde dedica na dos baluarte esta Jacobo Jansen y Gilbert Nando Maduro. Ambos tremendo atleta cu aportenan grandi na deporte entre otro e deporte di softball. Awe sinembargo ASB lo amplia riba e CV di Jacobo Jansen.
Jacobo Bonifacio Jansen un mucha homber noble di e bario di Sta Cruz a nace dia di 5 juni 1957. Jacobo tin 36 aña felismente casa cu Maria Altagracia Arnold di cual matrimonio nan tin yiu Jamira Kock Jansen y Jagiaro Jansen y alaves dos precioso nieta di 8 y 11 aña.
Algo cu a hala nos atencion ta cu Jacobo no a hunga baseball Little League. Jacobo a cuminsa hunga bala cu 17 aña di edad. Tabata na aña 1974 unda Jacobo Jansen a cuminsa hunga softball cu e equipo di Olympic di Sta Cruz den e campeonato di Aruba Softball Bond. Olympic e tempo aya tabata bao maneho di Pachi Maduro kende porcierto a bira Jacobo su promer manager.
Na aña 1977 Jacobo a cambia di equipo y a bay hunga cu e equipo di Plantersrust cual equipo a ser maneha pa Sixto “Dolfi” Krosendijk. Cu e equipo aki Jacobo a hunga como 4 campeonato.
Jacobo ta logra titula campeon cu Plantersrust y ta subi pa Liga Kibrahacha esta AA. Lamentablemente e equipo di Planterust no a logra wanta bataya den categoria AA y a degrada pa Liga Kwihi. Desde aki hopi wowo tabata riba Jacobo Jansen unda Jacobo a join e equipo di Aruba Video Center na aña 1981 y a hunga te na aña 92 cu e equipo aki cual por cierto tabata tambe e mesun equipo popular di baseball di Santa Cruz.
Desde aña 1991 e equipo di Aruba Video Center a cambia di sponser y a bira Pueblo Supermarket unda den mesun aña esta campeonato 1991/1992 Pueblo Supermarket ta logra derota Astros den final pa titula campeon y Jacobo ta logra titulo di champion batter. Riba e fecha 22 di Mei 1993 Pueblo ta derota Frissian Flag den final pa mantene su titulo di campeon den un best out of 7 dramatico. Jacobo den su trayectoria a logra varios titulo di campeon den Liga Kibrahacha esta softball AA e liga di mas halto.
Recordando e pitchernan di e temponan ey cu tabata domina tabata entre otro Wiwi Maduro, Lazaro Koolman, Henk Arnold, Rock Angela y Poy Flanegin. Jacobo ta splika cu e no tabata tin ningun problema pa bati ningun pitcher y ta gusta competencia.
Tanto e team di Video Center como esun di Pueblo Supermaket a ser maneha pa sr. Bibiano Croes y mas despues pa Jozef Albus (q.e.p.d) y Erick Mohamed. Na final di aña 92 pa cu campeonato 1992/1993 Jacobo a join Athletics, e mesun equipo di Gilbert Nando Maduro y a bay hunga bao liderazgo di Ronny Gomez. Cu equipo aki Jacobo a hunga fast pitch te aña 96 unda Jacobo ta titula campeon un biaha mas e biaha aki cu Astros. Despues di alrededor di 23 aña Jacobo a despidi di fast pitch.
Den AA esta Liga Kibrahacha Jacobo a bira 2 biaha champion batter: Na aña 1986 Jacobo ta logra e titulo maximo esta como champion batter cu su equipo di Video Center y na 1992 Jacobo Jansen ta ripiti esaki como champion batter cu su equipo di Pueblo Super Market. Jacobo a bati 48 turno 21 hit bon pa un averahe di 437.
Jacobo Jansen hungando den Selecion:
Jacobo Jansen representa Aruba den seleccion nacional di softball na varios ocasion. Jacobo Jansen a forma parti di selecion di Antiyas tambe y cu selecion di Antiyas Jacobo a biaha na 1982 y 1984 pa Republica Dominicana y Venezuela respectivamente. Cu e prome selecion Arubano despues di Status Aparte esta despues di 1986 , unda Aruba a sali pa prome biaha como pais, Jacobo a hunga na Indianapolis na Merca cu selecion di Aruba.
Jacobo Jansen hungando “Bush League”:
Ademas Jacobo a hunga Bush League tambe cu diferente equipo. Jacobo a hunga cu Avia Air di Lucky Winterdaal, cu Astros Amstelito di Boebeis Gomes den feliz memoria, cu Suprise cu Rock Angela y Jozef Albus den feliz memoria y cu Kenro Jewelers Liga 50.
Na aña 2009 pues net 10 aña pasa Jacobo Jansen a dicidi di cologa su glove y su sapatonan di bala y asina a retira di e deporte di softball. Jacobo Jansen tabata tin un bunita trayectoria tambe cu Baseball AA cu su equipo Aruba Video Center.
Aruba Softball Bond ta dedica e campeonato 2019 na honor di Jacobo Jansen apreciando su aporte grandi y positivo como un atleta ehemplar y un tremendo pelotero Arubano. Pabien Jacobo, pabien na bo senjora, yiunan, nietanan y henter famia y tur otro cu a brinda bo e oportunidad di haci loke bo a haci pa nos deporte. Merecidamente campeonato 2019 dedica na Bo persona.
