Home Policial Caso di abuso sexual contra mucha muher di 15 aña pero mama...

Caso di abuso sexual contra mucha muher di 15 aña pero mama no kier entrega keho

1281
0
SHARE
- Advertisement -

Cultura di miedo mester caba!

ORANJESTAD (AAN):   Comunidad di Aruba ta hopi preocupa. E discusion relaciona cu e casonan di abusonan sexual contra muchanan ta algo cu tin tur hende den shock.

Tur dia, practicamente, ta tende of lesa algo nobo relaciona cu algun situacion di abuso sexual unda un mucha ta envolvi.

E problema ta cu tin ora falta di prueba, y pesey e malhechornan ta sali liber. Pero ta increibel cu aki na Aruba ainda tin e cultura di miedo, di berguensa pa haci denuncia.

Diaranzon, un biaha mas a yega na mesa di redaccion informacion relaciona cu un otro caso unda ta indica cu un mucha muher a bira victima di violacion.

Den e caso aki, tin un investigacion andando caba y tambe lo tin pruebanan unda ta involucra un persona encarga cu IT di un scol.

A logra recolecta algun prueba y pesey aworaki e caso a bira di conocemento di comunidad henter.

E informacion cu DIARIO a haya ta cu e persona aki encarga cu IT di un scol lo a viola un mucha muher di 15 aña.  DIARIO tambe a haya informe cu e mucha a keda den un condicion di salud delicado pa locual el a pasa aden den man di e homber aki.

E mucha muher cu lo a wordo viola lo a confia un amiga di dje, via WhatsApp, y tambe el a confesa via telefon na mama di e mesun amiga aki. Tambe el a confesa personalmente na un otro amiga loke a pasa. Pero e mama di un di su amiganan no a keda keto. Kier a hiba e mucha docter pero pa miedo y otro asuntonan familiar, e mucha muher a scoge pa papia cu su mama. E mama sinembargo, a opta pa no haci nada. Scol tambe lo a haya sa di e sucedido y parce a opta pa nan keda keto.

Autoridad a wordo poni na altura. Pero esaki ta pa medio di e mayornan di e amiganan di e mucha muher. E mama mes no kier entrega un keho oficial na Polis te dia di awe.

Den e caso aki, Jeugd en Zeden Politie lo mester a meld na Voogdijraad, pasobra nan ta e prome instancia cu por meld na nomber di e mucha.

Ta hopi tristo pa mira con tin mensahenan di WhatsApp unda por lesa con e mucha ta confesa, tin dos message via Facebook Messenger, unda e sospechoso ta pidi e menor potret di su pechonan y un otro, con e ta papia di un manera hopi inapropia (vulgar) cu e mucha muher.

Mas leu, DIARIO a haya sa cu Slachtofferhulp tambe a cay aden. Con leu a yega no ta conoci, pero na final tur cos ta keda reduci na e hecho cu e mama no kier entrega keho.

Awor tur cos ta depende di Voogdijraad. Nan ta na altura di e caso y nan ta e instancia cu por actua. Ta pendiente tambe di e mama, si ta entrega keho of no pa asina e caso por cana mas lihe.

Mas detaye cu DIARIO por a haya ta cu e homber aki ta duna lesnan priva, na su cas y cu ta e mes ta busca e alumnonan pa bay cu nan su cas, pa haya les.

Den e caso aki, parce cu el a busca e mucha muher, pero niun otro studiante mas. E lo a laga sa cu tur otro mucha a cancela y pesey nan dos lo caba un proyecto di computer cu tabata tin pendiente. E dia ey tur cos lo a sosode.

E victima no tabata kier tin relacion cu e sospechoso. Y awo, e ta wordo presiona, influencia pa hendenan rond di dje, unda cu e ta bisa cu ta e amiganan a inventa esaki, mientras cu tin mensahenan di WhatsApp, caminda cu e victima ta conta den detaye kico a pasa.

Na otro banda, a purba splica e mama kico ta e consecuencianan di no entrega keho, pero el a dicidi pa no hacie. Si e mama no lanta un caso, ningun hende no por haci nada, pasobra e ta mama di e victima.

Den e caso aki, sino tin prueba di violacion, tin prueba a base di e mensahenan via social media, cu ta castigabel, unda e homber ta pidi e mucha muher menor di edad potretnan sunu y ta haci otro propuestanan vulgar.

DIARIO lo keda pendiente di mas informacion relaciona cu e caso tristo aki.

- Advertisement -

DUNA COMENTARIO

Please enter your comment!
Please enter your name here