Home Hudicial Caso penal contra muher cu tabata maltrata su yiu mucho pisa

Caso penal contra muher cu tabata maltrata su yiu mucho pisa

2064
0
SHARE
— Corte di Husticia na Aruba
- Advertisement -

Hues a hala e muher su atencion cu no ta manera

ORANJESTAD (AAN): Ultimo tempo mas y mas caso di mayor cu ta maltrata su yiu mucho pisa ta bay Corte.

E biaha aki tabata un muher, kende tabata maltrata su yiu homber di 12 aña si e yiu haya punto malo na school. E asunto aki a bira asina serio cu docente di school a ripara cu e mucha tabata manera traumatiza.

E mucha no tabata por mas cu tur e zundramento y maltrato di su mama. Docente a duna e mucha un schrift pa e skirbi kico tur tabata pasando. A base di loke e mucha a skirbi a cuminsa un investigacion contra e mama. Actualmente e mama ta bay psycologo y e yiu homber ta kedando cerca e tata y tambe ta bayendo tratamento. E pareha ta separa.

   MALTRATO DI MUCHA:

E acusacion cu Fiscal a presenta den Corte contra e mama ta, cu entre Februari 2018 y Maart 2018, e tabata maltrata su yiu homber di 12 aña. Tambe e mama ta worde acusa di a menaza su yiu cu si e no bay Colegio Arubano, e lo mat’e.

Den sala di Corte tabata presente e tata di e mucha, kende a haci denuncia di daño contra e mama.

Hues a bisa cu e yiu homber, acompaña pa su tata, a bay haci denuncia. Segun e mama, e no ta dal su yiu pero ta zundra e mucha hopi biaha pa motibo di school. Segun e mama ta duel e cu e tabata tabata firma proefwerk cu e mama mes no tabata sa. E juffrouw a reuni cu e mama y e ora el a haya sa di e onvoldoende.

E mama a bisa Hues cu el a dal e mucha dos biaha na su atras como diciplinario. Hues a mustra cu e docente di e mucha, mirando con e mucha tabata actua na school, a pidi e mucha pa skirbi den un schrift kico tur tabata pasando. A base di esaki, docente a pidi ayudo di trahador social. A hasta envolvi Polis pasobra segun e mucha, cada biaha su mama ta dal’e na su schouder ora e haya punto malo na school.

E mucha a haya hopi miedo di su mama y hasta tabata kier a mata su curpa pasobra su mama a menaza cu si e no bay Colegio e lo mat’e.

E mama a bisa Hues cu loke su yiu a skirbi tabata un sorpresa p’e pasobra e no tabata sa kico su yiu tabata sinti. El a bisa su yiu pakico e yiu no a bay papia cun’e. E mama a bisa cu e ta hopi severo cu su yiu pa cu school y por ta el a dal su yiu un biaha cu un map. El a para riba cu e no ta dal su yiu. Hues a remarca cu no por ta asina cu yiu mester tin miedo di su mama. E mama a bisa cu actualmente nan ta bayendo un psycologo pa drecha e relacion.

E casa a demanda 700 Florin di cual 200 Florin ta pa un test di psycologo cu e yiu mester a haci y 500 Florin pa e cellular cu e muher a kibra den su rabia.

   EXIGENCIA DI FISCAL:

Fiscal a bisa Hues cu e ta haya cu e mama a menaza e yiu homber y dal’e. Na opinion di Fiscal, e mama mes a admiti di a dal su yiu diciplinario. E pregunta ta kico ta dal diciplinario. Pero si mira kico e mucha ta skirbi den schrift cu e ta worde bati y mas ainda si e haya punto malo na school, esey no ta diciplinario mas. Fiscal a bisa cu ta comprendibel cu un mayor kier lo mehor pa su yiu pero no asina cu ta bay bati su yiu.

Pa loke ta e menaza, Fiscal tabata pensa riba esaki. El a mustra cu na Polis e mama a bisa cu por ta el a bisa asina. E mucha a bisa asina. Fiscal a remarca, pakico e mucha ta bay bisa algo asina di su mama. E no tin duda den e mucha. Mirando e hecho cu diferente cosnan cu e mucha a skirbi, e mama a admiti, Fiscal ta haya cu tin suficiente prueba di sosten pa menaza. E pregunta ta, ki castigo mester duna. Fiscal a bisa cu e ta tene cuenta cu riba insistencia di abogado e mama ta bay busca ayudo di psycologo.

E ta haya cu esey mester a sosode mucho mas promer. Fiscal a exigi 50 ora di trabao pa comunidad of 25 dia sera, di cual 20 ora ta condicional y 10 dia di prison ta condicional cu un tempo di prueba di 2 aña. Pa loke ta e demanda di daño, Fiscal a mustra cu e cellular cu a kibra no ta bin dilanti den e caso pesey el a pidi pa rechaza esey. Pa loke ta e gastonan di 200 Florin, no tin documento pesey el a pidi rechaza esey tambe.

   DEFENSA DI ABOGADO:

Abogado mr. Bryson a bisa Hues cu e mama a bay fundacion Sostene Mi for di aña pasa Maart 2018. E fundacion ta haya cu tin problema di comunicacion. Abogado ta haya Polis y Fiscal a faya den e caso aki. El a mustra cu e mucha di 12 aña hunto cu su tata ta haci denuncia.

Polis ta bay scucha e mucha sin cu a busca un experto pa evalua e mucha pa mira si door di su emocion e lo bay bisa cosnan contra e mama. E abogado ta haya cu mester a investiga mas loke e mucha a skirbi den e schrift. Mester a investiga kico e mucha kiermen cu bati y si a mira marcanan blauw na su curpa of tin herida cu a sangra.

Asina lo por a determina si ta dal pa diciplina of sla duro. E abogado a cuestiona cu no a busca asistencia di un psycologo of voogdijraad ora di investigacion. El a pidi Hues pa laga e declaracion di e mucha for di e caso. E abogado ta haya cu mester a busca un specialista pa haci investigacion pa saca afor kico realmente tabata pasando. El a bisa cu e ta laga na decision di Hues riba e dalmento di e mama pero ta haya cu mester declara e mama liber pa menaza e mucha. E abogado a bisa Hues cu ta di lamenta cu no a haci un Tomzitting pa e caso aki sino un caso penal. E abogado tambe ta haya, mescos cu Fiscal, cu mester rechaza e demanda di daño.

Fiscal a reacciona cu e aña aki a bin cu plan di maneho pa cu problemanan asina. Aña pasa no. E tin comprension pa cu e critica di abogado. No ta haya cu mester laga e declaracion di e mucha afor.

   SENTENCIA:

Hues a sera tratamento di e caso y a dicta sentencia di biaha. Hues ta haya legalmente proba cu e mama a maltrata su yiu homber. Hues a mustra cu ademas di declaracion di e mucha y e tata, e mama mes a bisa den Corte cu a dal e mucha pero diciplinario.

Hues ta haya cu e mama a bay mucho leu door di dal e mucha pasobra e no tabata haya punto bon. Hues a bisa cu e no ta haya suficiente proba e menaza. Ta solamente e declaracion di e mucha tin contra e mama. Hues ta haya ta bon cu e mama ta busca ayudo.

Hues ta haya cu no mester castiga e mama ainda. El a condena e mama na 40 ora di trabao pero condicional cu un tempo di prueba di 2 aña. Pa loke ta e demanda di daño, Hues a rechaza esaki pasobra e cellular kibra no tin nada di haci cu e caso y e otro no tin informacion y pesey a declara e demanda no admisibel.

- Advertisement -

DUNA COMENTARIO

Please enter your comment!
Please enter your name here