Home General Citgo Aruba y e mision sagrado di e matutino di Aruba

Citgo Aruba y e mision sagrado di e matutino di Aruba

64
0
SHARE
- Advertisement -

Dia 15 di October 2016 Jossy Mehsen Mansur a tuma despedida definitivo di e pais cu el a sirbi na alma y curpa.  Como luchado pa e causa di Aruba, el a entrega Aruba e arma di un matutino, skirbi na e idioma di su pueblo pa asina sigura bienestar di Aruba riba tur tereno.

Na momento cu Jossy Mansur a despedi, e no tabata sa cu Aruba na 2016 a drenta uno di e periodonan mas dificil den historia di e pais. Sinembargo, Jossy Mansur a percura di entrega su herencia na su sucesornan den gerencia y na cabes di redaccion di DIARIO.

Jossy Mansur a laga atras e spirito di lucha pa Aruba, cu a bira inspiracion pa tur cu mester a duna Aruba e informacionnan necesario pa pueblo Arubano por a enfrenta e dificultadnan grandi cu tabata spera e pais.

Despues cu Jossy Mansur no tabata presente mas, nubianan scur a cuminsa acumula na e horizonte di Aruba. Na 2017 tabata evidente cu e pais a drenta un crisis grandi mientras tension mundial tabata aumenta a base di desaroyonan na Venezuela.

Na 2018 Aruba tabata den necesidad di defensa di su bienestar. Aruba a bolbe na situacionnan den cual e vision di Jossy Mansur a origina.

Consciente di su mision sagrado, DIARIO a lanta para y cu e espirito luchado hereda a prepara Aruba pa e berdad tras di su crisis economico y financiero y pasonan cu mester a wordo tuma pa saca Aruba for di e situacion sumamente peligroso cu a culmina na 2018.

Awe ta den e espirito di Jossy Mansur, DIARIO ta bisa Aruba cu el a cumpli y cu tur informacion oficial y concreto cu awe a wordo duna na Parlamento, ta confirma cu DIARIO a duna Aruba e bista corecto riba e proyecto Citgo cu a pusha Aruba den e abismo di insiguridad, incertidumbre y peliger.

Aruba mester subi un rumbo nobo hunto cu tur su lidernan despues cu un analisis di tur loke a wordo presenta awe den e sala di e representacion oficial di Aruba a confirma e noticianan di DIARIO.

Ta a base di e mision sagrado di e herencia ricibi di Jossy Mehsen Mansur, DIARIO por enfrenta pueblo di Aruba cu honestidad y cu e siguransa cu Aruba ta dispone di un arma potente pa defende e bienestar nacional y di cada ciudadano.

- Advertisement -

DUNA COMENTARIO

Please enter your comment!
Please enter your name here