Home Economia Cu introduccion di biyetenan nobo, Banco Central tabata tin e obhetivo di...

Cu introduccion di biyetenan nobo, Banco Central tabata tin e obhetivo di mantene e confianza den e florin

56
0
SHARE
- Advertisement -

Presidente di Banco Central di Aruba:

ORANJESTAD (AAN): Despues cu Diabierna Banco Central (BCA) oficialmente a lanza e serie nobo 2019 di biyetenan di florin, Director Ehecutivo di e banco Miriam Gonzalez a hiba palabra.

El a splica cu tabata un caminda hopi largo, pero ‘leuk’ pa traha hopi di cerca cu hopi hende cu normal e lo no topa.

“Pami personalmente tabata hopi bon, pasobra tabata un di e prome opdrachtnan cu mi a haya como director di banco”.

“Mi tabata tin un team tremendo pa traha cune, incluyendo un presidente cu tabata all the way nos tras, cu tur cos cu nos tabata tin pensa pa hasi”.

“Cada biaha cla pa discuti, pa nos pensa, pa nos hasi tur locual nos tabata tin mester di hasi”.

Esaki segun e director di BCA, kende a indica cu un persona cu sigur a yuda hopi tabata Penelope Tromp-Gomez y diferente otro hende den e team di banco y otronan cu no ta traha na Banco Central.

Gonzalez a splica cu tabata tin algun momento tenso, pero a crea asina un bon lazo cu otro cu a logra yega hopi leu.

“Mi kier a splica kico e biyetanan nobo aki ta nifica pa nos y kico nos ta spera cu e ta bay nifica pa purblo di Aruba”.

“El a hasi ami personalmente y mi team di banco hopi conciente di unda nos ta biba y con nos ta bayendo y nos kier pa e sigui bay na un bon manera”.

“Trahando riba dje nos tabata mas conciente cada biaha di nos bida akinan na Aruba”.

“Nos a tuma e tema principal cu ta bida na Aruba, nos a tema diferente aspecto cu nos ta topa tur dia, pero cu nos no ta conciente di dje”.

“Bo por topa tur dia cu e cododo, prikichi, turtuga of shoco por ehempel, pero ta te dia cu e no tey mas bo ta haya su falta”, segun Gonzalez, kende a indica cu pesey riba e biyetenan a dicidi di pone diferente aspecto di nos flora y fauna, nos herencia cultural, monumentonan y lugarnan prominente di Aruba.

E director a sigui bisa cu e introduccion aki di biyetenan nobo, Banco Central di Aruba tabata tin e obhetivo di mantene e confianza den e florin.

“Nos tin algun aña caba cu nos propio florin y nos a ripara cu e Arubiano stima su florin, pues nos tabata kier a mantene esey”.

“Tambe nos tabata kier a contribui na e promocion di e caracter unico di Aruba su flora y fauna, herencia cultural y monumentonan pa nos bishitantenan y specialmente pa e futuro generacion di Aruba, pa mayan nan tambe por goza di tur locual nos ta gozando di dje awor”, segun Gonzalez.

- Advertisement -

DUNA COMENTARIO

Please enter your comment!
Please enter your name here