Home CORTE Cuatro aña di prison pa duo Colombiano cu 200 kilo di marihuana

Cuatro aña di prison pa duo Colombiano cu 200 kilo di marihuana

8
0
SHARE
- Advertisement -

Guarda Costa a los tiro pa e boto a para

ORANJESTAD (AAN): Diabierna mainta e hombernan Colombiano M.T.C. y E.P.L. a scucha Hues confirma e exigencia di Fiscal di 4 aña di prison pa e casi 200 kilo di marihuana cu nan a purba trece Aruba riba 22 October 2018 den un boto.

Tur dos ta bisa cu e otro dos personanan abordo di e boto (cu autoridad a manda bek Venezuela) ta nan ta esnan encarga cu e droga. Ni Fiscal, ni Hues no a kere e storia aki.

    IMPORTA 200 KILO DI MARIHUANA:

E acusacion cu Fiscal a presenta den sala di Corte di Husticia di Aruba ta cu e Colombianonan M.T.C. y E.P.L. ta wordo acusa di importacion di 200 kilo di marihuana riba 22 di October 2018.

Hues a puntra nan si ta berdad e acusacion y ambos a admiti.

    GUARDACOSTA A TIRA:

Hues a lesa e raport di Polis caminda ta mustra cu Guarda Costa, riba 22 di October 2018 a mira un boto via radar ta nabega den awanan territorial di Aruba riba e ruta cu ta wordo usa pa traficacion di droga. A bay riba e boto cu no tabatin lusnan sendi. A mira cu e capitan a core cambia di ruta y purba bay cu velocidad.

Miembronan di Guarda Costa a tira 4 biaha di advertencia y asina e capitan a para e boto.

E miembronan di Guarda Costa a mira M.T.C. benta dos duffle bag (un tipo di handbag grandi) for di boto. A pisca esakinan y abordo di e boto a haya cantidad di duffle bag y dos tanki. Tabatin 4 persona abordo. A base di declaracion di e personanan, dos tabata ilegal pa drenta Aruba y a saca nan. Casi 200 kilo di marihuana a keda confisca. 270 paki a keda confisca. A tuma muestra di esakinan y a haci investigacion na Laboratorio y a constata cu ta marihuana. E lote di droga aki ya a wordo destrui.

Hues a bisa cu na Polis M.T.C. a admiti y a bisa cu e tabata debe un persona B. 3 Miyon Pesos y e persona a yam’e y bis’e pa haci algo p’e. E mester a busca 6 duffle bag cu marihuana y hiba nan Aruba. Door di haci esaki su debe ta keda regla. M.T.C. a bisa Hues cu Polis a compronde su declaracion robez. Segun M.T.C. e no tabata sa cu den e duffle bag tabatin droga. El a bisa cu e tabatin miedo pa nabega y tabata sospecha cu lo ta algo malo. E no kier a bay pero el a wordo menaza cu e mester bay.

Segun M.T.C., e ta kere cu e capitan E.P.L. lo tabata sa cu ta droga. Ora e capitan a mira Guarda Costa el a spanta y a purba navega cu speed bay. Hues a bisa cu un di esnan ilegal a bisa cu el a paga M.T.C. pa bin Aruba. Tambe el a bisa cu el a mira M.T.C. ta traha cu un GPS y tabatin 2 cellular. Ora a mira e Guarda Costa, el a tira e GPS afor y e dos cellularnan y 2 duffle bag. Segun M.T.C. tur esey ta gañamento.

E capitan E.P.L. a bisa Hues cu el a haya peticion di A. pa navega y ta wordo paga pesey. Segun E.P.L. ta un otro persona cu esun cu M.T.C. ta papia di dje. El a bisa cu den boto tabatin 3 persona. Segun E.P.L. e capitan di e boto ta un tal Roberto. Mas o menos 500 meter for di costa di Aruba, Roberto a bisa E.P.L. pa tuma over. Roberto hunto cu e otro persona abordo lo tabata pa bay tera. Roberto a prepara e duffle bagnan pa bay tera.

E.P.L. a bisa Hues cu M.T.C. tabata esun cu lo compañe pa bay bek Venezuela. Segun E.P.L. e momento ey Guarda Costa a intercepta nan. E.P.L. a bisa Hues cu ta Roberto a bisa M.T.C. pa tira e tasnan den laman. El a bisa Hues cu el a bisa Guarda Costa cu ta Roberto ta e capitan y hunto cu e otro persona a bin cu e droga. El a remarca cu awor e dos personanan ey a wordo laga liber.

EXIGENCIA DI FISCAL:

Fiscal a bisa Hues cu e ta haya legalmente proba cu e duo aki a importa droga. E declaracionnan ta desvia di otro. E dosnan cu a wordo laga liber y saca for di Aruba, tabata e ilegalnan. Awor M.T.C. ta bisa cu esnan cu a wordo laga liber tabata esnan di e droga.

Fiscal a bisa cu e no ta kere esaki. Miembronan di Guarda Costa a mira M.T.C. tabata tira duffle bagnan for di boto. E.P.L. a wordo paga pa transporta e tasnan y hendenan Aruba. Na momento cu Guarda Costa a intercepta nan, E.P.L. tabata stuur e boto y a purba hui. Fiscal a exigi 4 aña di prison pa ambos.

   ABOGADO:

Abogado mr. Arendesz a bisa Hues cu e ta haya cu e duo no tabata sa cu den e tasnan tabatin droga. E ta haya cu tin cosnan cu no ta corecto. E otro dos personanan cu tabata abordo a wordo entrega na Warda Nos Costa pa wordo saca for di Aruba. Abogado a mustra cu e dos sospechosonan no a wordo mustra riba nan derecho.

E ta haya cu miembronan di Guarda Costa a interoga e duo sin cu tabatin abogado presente. A base di loke nan a bisa a traha e documento cu a duna nan caminda nan ta wordo acusa di importa droga. El a mustra cu un di e personanan cu a laga liber tabata percura pa e tanki di gasoline di e motor di boto constante tabata yen.

E abogado ta haya cu e otro dos lo a traha un plan pa tira culpa riba e dos sospechosonan. Ta e otro dos tabatin intension di keda Aruba mientras cu e duo lo navega bek pa Venezuela. E abogado a remarca cu door cu a laga e dos liber no ta posibel pa haci nan pregunta pa haya mas claridad den e caso aki. El a pidi Hues pa duna e duo castigo mucho mas abou cu loke Fiscal a exigi. El a mustra riba sentencia di Hulanda cu aki ta trata di marihuana cu ta wordo considera cu softdrugs. El a mustra riba un caso na Hulanda caminda pa mas cu 600 kilo di marihuana, e sospechoso a haya 24 luna di prison.

Fiscal a reacciona cu e miembronan di Guarda Costa no a haci interogacion. No tin ningun raport di esaki. A haci pregunta pa asina por cuminsa e procedura. Guarda Costa a mira M.T.C. tira tasnan afor. El a remarca cu no a haya ningun peticion di abogado pa scucha e dosnan como testigo. Pesey no por bisa awor cu door cu a laga nan liber no por scucha nan mas como testigo. Pa loke ta e castigo duna na Hulanda, Fiscal a remarca cu Aruba no ta Hulanda. Tin casonan na Hulanda ta wordo atendi otro cu Aruba. Ta usa hurisprudencia cu ta aplicabel pa Aruba.

Abogado mr. Arendsz a cuestiona cu e no ta compronde Fiscal pasobra tin caso caminda si ta usa hurisprudencia di Hulanda como referencia pa duna castigo.

   SENTENCIA:

   Hues a sera tratamento di e caso y a bisa cu e ta dicta sentencia di biaha. Hues a bisa cu no tin declaracion di Guarda Costa cu e dosnan a wordo interoga. Hues a bisa cu e no tin motibo pa duda den declaracion di sospechosonan haci na Polis. M.T.C. a bisa cu e tabata sa cu den duffle bagnan tabatin droga. Ademas si e no tabata sa mes, tur hende sa cu otro ta transporta duffle bagnan for Venezuela pa Aruba, e chens ta grandi cu ta droga. Tambe el a mustra cu nan tabata navega cu lusnan paga.

Pa cu e castigo, Hues a bisa cu e ta tene cuenta cu ta un cantidad grandi di droga a wordo haya riba e boto. El a tene cuenta cu ta promer biaha cu e duo aki a cay sera pa droga. Hues a sigui bisa cu e ta tene cuenta cu castigonan cu na Aruba ta wordo duna y no Hulanda.

Hues a conclui cu e ta haya e castigo exigi pa Fiscal na su lugar. Hues a condena e duo na 4 aña di prison.

- Advertisement -

DUNA COMENTARIO

Please enter your comment!
Please enter your name here