Pa sushi tin un lugar y esey ta dump y no e dam
ORANJESTAD (AAN): Randy Maduro di Santa Rosa a duna di conoce cu constantemente nan ta keda haci peticion na comunidad pa yuda mantene e damnan limpi.
Algun siman atras a pasa haci e dam na Hooiberg limpi y awor a bin haye cu sushi. El a bisa cu ora cu ta tira sushi den dam, ora cu awa yobe ta e mesun usuario ta bay sufri di dje. Ora di acerca un productor local y si e awa no ta bon e productor no por sigui planta, a remarca.
Maduro a bisa cu nan ta keda haci apelacion pa no bay coy awa di dam pa pega bloki, of traha cement, laba auto, muha caminda, etc.
Esey no ta e proposito pakico e dam a wordo crea. Pa sushi tin un lugar y esey ta dump y no e dam, a expresa.
E damnan ta wordo manteni regularmente y pa haci e dam limpi den dje, e awa mester seca completo. Pero ta keda haci apelacion pa bay tira e sushi na dump. El a agrega cu di parti di Santa Rosa nan no tin e autoridad pa pone piedra of candal pa prohibi e entrada na e dam.
SECURA
E aña aki ta bay ta mas seco cu aña pasa. Kiermen ta bay tin mas secura, Randy Maduro a indica.
Pero ta spera tog cu awa por yobe un tiki pa asina e damnan por ta yen y pa asina e agricultornan por haci uso di dje.
ACCION CONTRA MAL USO
Finalmente, Maduro a laga sa cu na dado momento lo mester laga polis tuma accion contra esnan cu ta uza e dam pa otro uzonan cu no ta agricultura. Di parti di Santa Rosa no por haci mucho, a expresa.
