Home General DAS ta bezig dunando hopi guia, yudanza y informacion pa reforza e...

DAS ta bezig dunando hopi guia, yudanza y informacion pa reforza e famianan

38
0
SHARE
- Advertisement -

Relacionista Publico Jesseline Soto-Kelly:

ORANJESTAD (AAN) – Den conexion cu e Dia Mundial di Famia, cu a keda celebra Diaranzon 15 di Mei, Jesseline Soto-Kelly, Relacionista Publico di Departamento di Asunto Social (DAS), a señala cu DAS ta traha hunto cu e famia y ta hopi activo den su esfuerzo pa reforza e famianan na Aruba.

Nan tin dos seccion: Uno ta seccion Guia Social y otro ta seccion Bida y Famia, cu ta duna guia, yudanza y terapia na famia.

Soto-Kelly a haci un comparacion con e famia na Aruba antes y con e ta aworaki. Antes tabata tin un control social hopi grandi riba e famia, compara cu awo. Famianan tabata hopi mas uni, incluso hendenan cu no tabata famia di otro tabata hunga un rol y tabata comparti e aspecto di lantamento di mucha.

Antes mayoria di mama no tabata traha. E tata tabata traha pa provee y ora e muchanan tabata bin bek di scol nan tey. E dama a expresa cu esaki no ta algo di hopi aña pasa pero di tempo cu e mes tabata un mucha. Nan tabata mira e union den bario asina grandi y hopi tabata aporta den un famia, sin cu nan tabata parti di e famia. Hopi biaha e tabata e bisiña. Muchanan tabata tin respet pa e personanan aki.

Sra. Soto-Kelly ta mira cu poco, poco e norma y balornan den nos comunidad ta bayendo perdi, y ta bon pa keda recorda con e tabata prome.

E ta conciente cu hopi cos a cambia. Cu tecnologia ta hunga un rol hopi grandi den lantamento di mucha, y e situacion ta cambia den cas di hopi famia.

“Nos tin un cifra halto di divorcio awendia. Esaki ta haci hopi influencia den e constelacion di famia cu ta cambia, y ki efecto esey por tin riba lantamento di mucha.

“ Un control social mester sigui tuma lugar, y esey kiermen un union den bario y cada un di nos ta hunga un rol cerca di un famia cu no ta nos famia”, Soto-Kelly a subraya.

Actualmente DAS tin un programa di prevencion, y nan ta dunando charla y cursonan. Durante henter e luna di Mei nan ta dunando un curso cu ta “Disciplina Conciente” den cual tin 20 mama y tata cu ta siguiendo esaki, y den dje nan ta ricibi diferente tips encuanto lantamento di mucha, y pa nan mes como mayor.

Nan tin un lista di charla tocante temanan manera: Salud Mental, Cuidando Bo Cartera, Etapa di Desaroyo di Mucha, entre otro. Sra. Soto a splica cu nan ta purba asina aki, di ta mas cerca di e comunidad. Fuera di esey tin trahadornan social cu ta duna charla na companianan priva, gruponan pa mama, pareha, etc. Pues, nan ta purba di ta hopi activo y mas cerca di pueblo.

Personanan cu mester di mas informacion por acudi na DAS libremente. Nan ta riba facebook, website, y nan ta hopi habri. Sra. Soto-Kelly mes ta haya hopi mensahe tur dia, sea preguntanan of pa informacion, y e ta duna contesta te unda cu e por y si no, e ta pasa e mensahe na un colega specializa. Hunto nan kier brinda e servicio y e informacion pa tur hende cu mester di dje, y muchanan cu ta bayendo scol cu ta traha riba proyectonan di tema social y asina nan ta sigui siña otro riba e tema social na Aruba.

- Advertisement -

DUNA COMENTARIO

Please enter your comment!
Please enter your name here