Prome Minister
ORANJESTAD (AAN): Prome Minister Evelyn Wever Croes recientemente a reuni cu World Bank durante su bishita na Merca, pa wak con nan por yuda fortifica economia di Aruba.
“Si nos economia ta fuerte nos por yuda mas hende, pero manera cu e economia ta actualmente, nos tin cu yuda nos hendenan prome cu nos por yuda otronan”.
“Awor cu nos a splica con e impacto di e crisis ta aki na Aruba, e siguiente paso ta cu nos ta bay hiba e mensahe aki tambe pa Hulanda”.
Esaki segun e mandatario, kende a indica cu otro siman e mester bay Estonia, pa hiba palabra durante un conferencia di E-Government .
“Estonia ta yuda nos den e proceso di E-Government y nan kier pa nos splica con nos ta bay aplica esaki den un pais chikito”.
“Mi lo probecha e ora ey pa pasa Hulanda pa tene reunionnan cu Eerste y Tweede Kamer cu entre otro Prome Minister Mark Rutte y otronan, pa papia di e impacto akinan y pa papia di e espacio cu Aruba tin mester pa por atende cu tur asunto local como tambe cu e crisis aki cu ta bin”.
Esaki segun Wever Croes, kende a sigui bisa cu e peticion di Aruba pa asistencia financiero na Nacionnan Uni y Union Europeo ta kedando cla.
E mandatario a indica cu e lo presenta esaki tambe na Gobierno Hulandes, pa mustra nan cu e situacion na Aruba ta serio.
