Home Salud “E poblacion di Aruba ta den un fase di envehecimento”

“E poblacion di Aruba ta den un fase di envehecimento”

150
0
SHARE
- Advertisement -

Segun Ir. Edwin Jacobs, director di SVb:

ORANJESTAD (AAN) — Manera DIARIO a informa den su edicion anterior, siman pasa, durante un simposio na Corsow, organiza pa e Consehonan Social Economico di e paisnan autonomo den Reino, director di SVb tabata un di e oradornan.

Siguientemente, DIARIO ta elabora riba e di dos parti di su entrevista cu director di SVb, Ir. Edwin Jacobs.

Diario: – Sr. Jacobs na diferente ocasion ta informa tocante e envehecimento di nos poblacion. Con e situacion ta realmente?

Sr. Jacobs: “Berdad ta cu e ultimo añanan na diferente ocasion nos ta informa comunidad riba e cambio den nos poblacion cu nos ta experenciando. E cambio aki nos ta yama envehecimento. E proceso aki ta encera cu e poblacion di 60 aña of mas, no solamente ta crece den cantidad pero tambe su porcentahe den e totalidad ta subi. Na 2015 ta calcula cu casi un 19% di e poblacion tabata tin 60 aña of mas. Segun nos proyeccionnan, si no trece hende di pafo, pa aña 2030, e grupo di 60+ ta representa un 30% di nos poblacion”.

Diario: – Pero sr. Jacobs, e cifranan aki ainda no ta bisa e publico mucho. Con nos por confirma nos grado di envehecimento?

Sr. Jacobs: “E pregunta ey ta sigur, un valido. Y den nos monitoreo na SVb nos a tene cuenta cu esaki. E Comision Economico di Nacionnan Uni pa America Latina y Caribe, CEPAL, a caba di adopta un categorizacion nobo den e proceso di envehecimento. CEPAL ta distingui cinco fase den e proceso di envehecimento di un pais:

  1. Envehecimento inicial
  2. Envehecimento modera
  3. Envehecimento modera avanza
  4. Envehecimento avanza
  5. Enbehecimento hopi avanza.

“ E categorisacion di e proceso di envehecimento ta wordo determina pa dos indicador. E prome ta e Tasa Global di Fecundidad. Esaki ta representa e promedio di yiu pa hende muher den un poblacion. Ta di remarca aki cu e tasa di reemplazo ta na 2.1.

“ Na momento cu e tasa baha bao 2.1, e poblacion no tin potencial mas pa crece riba su mes. E di dos indicador ta e porcentahe di e poblacion 60+ den e totalidad. Ta bon pa menciona cu den aspecto demografico y di convencionnan internacional encuanto e adulto mayor, ta defini esaki desde 60 aña. Den aspecto economico, ta emplea e edad di 65. Den e siguiente dos graficonan di CEPAL, nos ta ubica e situacion di Aruba. E grafico I.7 ta mustra e situacion den nos region den e periodo 2015-2020. Den e grafico nos constata cu Aruba ta cay den e grupo di paisnan cu un envehecimento hopi avanza. Aruba ta na di 4 lugar despues di Barbados, Cuba y Uruguay. (Grafico 1.7) E grafico I.8 ta mustra e situacion pa e periodo 2030-2035. Aki nos ta constata cu pa 2030, Aruba ta keda den e categoria di envehecimento hopi avanza. No solamente esey. Aruba ta pasa ocupa e di dos lugar despues di Cuba. (Grafico 1.8).

Diario: – Awor sr. Jacobs, kico esaki ta nifica concretamente pa nos comunidad?

Sr. Jacobs: “Sin duda cu envehecimento ta conduci na cambionan significante den nos comunidad. Cambio cu mester keda atendi pa un maneho publico diferente. Den un siguiente edicion, Diario lo presenta e siguiente parti di nos entrevista cu sr. Jacobs director di Banco di Seguro Social di Aruba.

- Advertisement -

DUNA COMENTARIO

Please enter your comment!
Please enter your name here