Home Politica Fraccion di MEP lo kier bin cu cambionan riba e pakete total...

Fraccion di MEP lo kier bin cu cambionan riba e pakete total di AZV

203
0
SHARE
- Advertisement -

Debi na aumento di gasto den cuido medico:

ORANJESTAD (AAN) – Parlamentario Endy Croes, durante e conferencia di prensa di fraccion di MEP, Dialuna, a referi na un reunion cu nan tabata tin cu e top funcionarionan di AZV, den su totalidad, incluyendo e Hurista di e Institucion.

Esaki den sentido cu fraccion di MEP tin, den su lista di prioridadnan, revisa e ley di AZV. E parlamentario a subraya cu e ley aki ta hopi anticua, mientras cu mundo ta cambiando, y por mira tambe cu e cifranan gasto di AZV ta keda aumenta.

Croes a indica (y mustra riba pantaya) cu na 2010 e servicio di salud tabata costa na Aruba 330 miyon florin, cu den e ocho añanan siguiente a bira 400 miyon. Esaki ta nifica di un aumento di 3%, 2.9% y 4% anual.

E parlamentario a menciona cu si no haci algo lo yega un dia cu “lo carga awa hiba lama”. Por keda aumenta e BAZV pero si e costo y gastonan ta keda aumenta hunto cune, ta yega un dia cu lo no por sostene esaki mas.

Pa tal motibo, e mes ta trek e parti di e ley aki. Esaki a wordo papia internamente, y a dicidi pa pidi AZV e reunion, y asina duna e fraccion di MEP pa nan duna nan vision y scucha esun di Parlamento, y wak con hunto por percura pa e sostenibilidad di AZV e añanan nos dilanti, pa e futuro generacion tambe por goza di un seguro di malesa, manera e pueblo ta gozando di dje awo.

Bolbiendo na e cifranan, e parlamentario a bisa cu na 2011 e landsbijdrage di Gobierno tabata 122 miyon florin, y desde cu a introduci cu BAZV esaki a cuminza cubri 82 miyon, a cuminza trece 117 miyon aden y e landsbijdrage di gobierno enberdad a baha. Pero ora di mira cu e gastonan di cuido ta keda subi, ta preocupante pa keda haci nada y laga e situacion aki “crash”. Pa e motibo ey, fraccion di MEP a trece su pensamentonan dilanti.

Tin diferente faceta den e ley, por ehemplo e inversionistanan cu tin bon capital den e ley tin un clausula cu ta permiti nan registra den censo, y esaki ta duna nan e derecho di tin e aseguro di AZV. Tin di nan mes ta bisa cu nan ta haya cuido medico por nada.

Esaki ta fraccion di MEP ta bay revisa, y asina lo tin cambionan den e pakete total pa asina por mitiga e parti aki.

Otro aspecto, cu segun e parlamentario, ningun hende gusta papia riba dje, ta cu e studiantenan local cu ta bay Merca of otro pais, nan tin cu presenta un seguro prome cu nan drenta scol. Aki na Aruba, tur hende cu ta bin traha ta inscribi na censo y automaticamente nan ta haya nan seguro y tin cu hasta ta bin cu famia y tur ta haye. E no tin nada contra esaki, pero ora di mira e cifranan espantoso kizas por pensa cu pa e prome cinco añanan, nan ta cumpra un seguro, locual ta masha normal den cualkier parti di mundo.

Ademas, el a menciona e sistema di control medico cu e trahadornan invita tin cu pasa den dje prome cu nan haya nan permiso. E ta haya cu mester haci un control profundo cu por garantiza cu e personanan aki por traha diez pa 15-20 aña sin problema pero sin hunga cu sentimento di salud, pa e hendenan cu ta bin traha na Aruba ta saludable. Fuera di esaki mester revisa edad.

Parlamentario Croes a menciona cu esaki ta algun di e cambionan cu Fraccion di MEP kier mira. Banda di tur esaki Minister di Husticia tambe a haci un apelacion riba articulo 38 riba e derecho di un prisionero di haya cuido. Esaki ta cay awor riba Land Aruba y ta e unico porcion cu no ta cay bao di AZV, y cu tin un peticion di gobierno pa wak con leu esaki por wordo traspasa pa AZV, aunke e lo crea un tiki gasto pa e aseguro di otro banda. Pero den su totalidad, segun Parlamentario Endy Croes, ta na su lugar pa papia riba esaki y wak con por bin dilanti pa tin un AZV sostenible, pasobra locual por a mira via cifra, AZV ta costando pueblo awendia mas cu 400 miyon florin cu ta un aumento di 70 miyon den e transcurso di ocho aña, cu ta mas cu 1% di e BAZV. E ta spera cu tur e partnernan pone nan nanishi den mesun direccion. E fraccion a compronde for di AZV cu nan a paga un compania di Hulanda pa haci un estudio riba e temanan riba diferente cifra y e resultadonan lo ta bin cla despues di e di dos cuartal.

- Advertisement -

DUNA COMENTARIO

Please enter your comment!
Please enter your name here