ORANJESTAD (AAN): DIARIO a tuma nota cu e cadena internacional di noticia Reuters a duna di conoce cu Venezuela ta habriendo bek e frontera cu Brazil y tambe cu Aruba. Esaki ta loke e Vice Minister di Economia Tareck El Aissami a bisa diabierna.
Algun luna pasa, na Februari, Nicolas Maduro a cera e frontera pa evita e ayudo humanitario drenta Venezuela. Mientras cu na otro banda, e presidente interino Juan Guaidó a keda lucha pa e ayudo por a drenta su pais.
“Nos kier convirti’e den un region fronterizo pacifico”, El Aissami a bisa durante un aparicion den e television estatal. “Nos a ricibi garantia cu nos soberania lo wordo respeta y cu no lo tin interferencia den asuntonan cu mester wordo trata pa e venezolanonan”.
El Aissami no a haci referencia specifico na e fronteranan maritimo y aereo cu e otro islanan di Caribe manera Corsow of Bonaire, of e frontera terestre cu Colombia, cu tambe a wordo cera na Februari.
Locual no ta conoci ainda ta si e frontera ta wordo habri inmediatamente of si a pone un fecha specifico pa esaki tuma lugar.
Mientrastanto aki na Aruba, Gobierno, no a emiti ningun comunicado di prensa ni a yama un conferencia di prensa extraordinario relaciona cu e asunto aki.
DIARIO lo sigui e desaroyo aki di cerca.
Potret: Reuters
