Home Actividad Especial Fundacion Amor, Paz y Alegria a haci donacion na Maristella

Fundacion Amor, Paz y Alegria a haci donacion na Maristella

21
0
SHARE
- Advertisement -

ORANJESTAD (AAN) – Fundacion Amor, Paz y Alegria, recientemente a haci un donacion na Cas Maristella, cu a consisti di paña di cama y serbete, cu tabata un regalo di dos condominium, na cualnan e fundacion y su cinco comision, ta sumamente gradici.

Tambe entre e miembronan di e cinco comisionnan cu ta forma e fundacion, a recauda fondo pa regala cada mama un mug cu ta bisa “I Love Mom” un bolo chikito, en conexion cu Dia di Mama.

Sra. Gladys de Freitas, director di e fundacion, a duna DIARIO e informacion aki y tambe un relato contando con e idea di yuda diferente fundacion den nos comunidad, a cuminza.

Esaki tabata na 1991 tempo cu sra. de Freitas tabata traha na La Cabana, como housekeeping supervisor.

E tempo ey el a haya un reto den su man, cu tabata pa convence 140 empleado pa participa den e Comision di Proyecto, locual no tabata facil pa mustra nan cu eyfo, e grandinan, e muchanan di Imeldahof, Ambiente Feliz, etc., tabata tin mester di nan.

E tabata bay na tur piso pa papia cu e trahadornan como diez minuut pa purba convence nan di e necesidad di ayudo cu otro personanan eyfo tabata tin di nan y asina el a logra e meta y asina nan a bin participa den cinco proyecto cu ta encera Casa Cuna, Imeldahof, San Pedro Paviljoen, Maristella, entre otro.

Nan tin den plan pa haci un donacion na St. Pedro Paviljoen pa Dia di Tata.

Despues, e hotel tabata tin un sorpresa pe, cu tabata participa entre empleadonan di 1.700 hotel di Caribe, na Puerto Rico Holiday Inn.

Eynan el wordo scogi como “Supervisor di proyecto pa comunidad”, y a gana e galardon di “Supervisor di aña entre e 1.700 hotel di Caribe”.

Despues cu Gladys a retira di La Cabana el a sigui riba su mes cuminzando for di cero: sin sponsors, sin fondo, pa por yuda e grandinan y e muchanan cu mester.

El organiza un festival di canto den Centro di Bario Playa Pabao, na December ultimo, pa e muchanan special di Bibito Pin. E no a bay mucho bon, pero entre e miembronan di e cinco comisionnan nan a regala e fundacion un televisor di 42 inch y asina a cumpli cu e meta.

Dia 1 di Juni proximo, nan ta organiza un concierto Gospel, pa sigui yuda hende di nos comunidad. Sra. de Freitas ta haci un yamada na comunidad pa apoya e fundacion den e Concierto aki.

- Advertisement -

DUNA COMENTARIO

Please enter your comment!
Please enter your name here