Home Actividad Especial Fundacion Lanta Papiamento ta anuncia su Feria di Papiamento

Fundacion Lanta Papiamento ta anuncia su Feria di Papiamento

31
0
SHARE
- Advertisement -

ORANJESTAD (AAN) — Fundacion Lanta Papiamento a tene un conferencia di prensa, den cual drs. Joyce Pereira, miembro di e fundacion, a anuncia cu Diadomingo 26 di Mei awor, e fundacion ta bay tin un Feria di Papiamento.

Esaki ta e di dos biaha cu e feria aki ta wordo organiza pa conmemora e fecha di oficializacion di Papiamento y, e aña aki, ta celebra su 11 aña cu a bira oficial.

Tambe ta wordo celebra cu Fundacion Lanta Papiamento e aña aki ta cumpli diez aña di existencia.

E feria lo tuma lugar den Centro Playa Pabao, na unda Lanta Papiamento a keda lanza pa prome biaha, cu e momento ey no tabata un fundacion ainda pero nan tabata trahando pa e bira un fundacion.

Drs. Pereira a expresa cu aworaki ta hopi importante pa enfoca riba kico e fundacion a haci durante e diez añanan aki. E tabata un trabao, y ta ainda, hopi necesario y semper a traha fuertemente, riba concientizacion di nos pueblo, na fabor di Papiamento.

Drs. Pereira a señala cu tur hende sa cu Aruba a pasa den un historia basta largo di colonizacion den cual, netamente e aspectonan cultural di e pueblonan Antiyano y Arubano a keda discrimina, y esey a pone cu, entre otro, e Idioma Papiamento a sufri masha hopi mes. A sufri hopi den aprecio cu e hendenan tin pe, pasobra pa 200 aña largo a siña na scol, por ehemplo, cu Papiamento no ta un idioma, cu e ta un dialecto, cu no tin gramatica ni nada, y no por haci nada cune.

Te ainda recientemente, el a haya comentario di un persona cu nos no ta bay ningun caminda cu Papiamento y cu e no ta di acuerdo cu Papiamento den Enseñanza. Pues, ainda tin un lucha masha grandi pa hiba pa nos pueblo realiza cu e tin derecho riba su propio idioma. Pa setenta aña caba ta conoci den mundo cu hende tin derecho y UNESCO a proclama e derechonan humano universalmente, y mester tene cuenta cu esaki. Un di e derechonan ta cu no por discrimina ningun hende riba su raza, religion, descendencia, y tampoco riba su Idioma, y esey ta para tambe den Aruba su Constitucion, pero nos hendenan mes ta discrimina nan propio idioma.

- Advertisement -

DUNA COMENTARIO

Please enter your comment!
Please enter your name here