Home Economia Gobierno no ta bay elimina e crisis-heffing mas

Gobierno no ta bay elimina e crisis-heffing mas

225
0
SHARE
- Advertisement -

Parlamentario Richard Arends di AVP:

ORANJESTAD (AAN) – Parlamentario Richard Arends, di fraccion di AVP, den entrevista cu DIARIO a elabora tocante e reforma fiscal cu gobierno a introduci na December ultimo, y cu aworaki tin e comunidad y comercio den incertidumbre.

Un tema cu den pasado AVP a combersa ampliamente riba dje, segun e Parlamentario. El a señala cu e prome fase di e reforma fiscal no tabata nada mas cu un aumento di impuesto.

Arends a señala cu e parti mas esencial ta cu ta prohibi e comerciante di pone e BBO y BAZV riba e factura y incorpore den prijs, y practicamente e caracter temporal cu inicialmente gobierno a priminti na tur e gremionan, y sigur Camara di Comercio cu a bay di acuerdo cu un crisis-heffing temporario, e factor temporario aki ta disparce, na momento cu e ta introduci den e prijs.

E Parlamentario a subraya cu esaki ta crea un incertidumbre hopi grandi y tur hende por wak cu inflacion ta sigui aumenta specialmente fruta y berdura, cu ta 15% di e indice di consumo cu ta midi inflacion. E productonan aki so a aumenta riba 18%. Esaki ta causa di e decisionnan di gobierno, Parlamentario Arends a acentua.

E periodo temporario ta caba dia 1 di Juli proximo, pero gobierno ta conta cu tur e entradanan aki pa henter 2019. Arends a indica cu ya caba na December, ora cu a presenta e presupuesto 2019 unda cu a presupuesta e entradanan, AVP a puntra e minister cu a indica cu e crisis heffing aki ta temporario, pero nan no a conta cu un entrada pa seis luna so sino pa henter e aña, kiermen te cu 31 December 2019 e entrada di crisis-heffing ta conta. Arends a indica cu gobierno no ta bay elimina esaki. El a menciona cu si na dado momento e crisis heffing aki lo a wordo introduci pa yega na e normanan cu por premira pa yega na un surplus na aña 2018, fraccion di AVP lo a sostene esey, pero nan ta mira cu esaki ta aumento pa meramente financia un aumento di gasto di e aparato gubernamental.

E poder di adkisicion di e consumidor a baha, locual Banco Central ta mustra den su ultimo rapport di cuartal, door cu nan ta cumpra menos, y segun e parlamentario esaki ta bay sigui. Na momento cu ta kita un florin di e consumidor pa hinke den caha di gobierno ta un florin menos cu e comerciante tin pa inverti y un florin menos cu e consumidor tin pa gasta.

AVP a tuma nota tambe cu for di momento cu e gobierno actual a tuma e responsabilidad di nos pais e sentimento di e comerciante a bay atras, y esaki ta meramente debi na e actitud di gobierno ora e sali bisa  cu tin crisis financiero tur caminda, y cu ta bay bin cu mas impuesto y cu reforma fiscal, pero finalmente no a cumpli cu loke a priminti esey so ta desorganiza e consumidor, y esaki por mira den e resultado di e encuesta di Banco Central unda cu ya caba tin un bahada basta drastico di e sentimento di e consumidor pa cu e perspectivanan economico.

Tocante locual minister di finanzas a indica cu e situacion aki ta bin for di 2015, Arends a menciona dos motibo di incertidumbre e tempo ey cu tabata e deficit cu tabata tin y e desaroyonan den e refineria cu a keda te 2016, pero cu na 2017 a baha considerablemente.

- Advertisement -

DUNA COMENTARIO

Please enter your comment!
Please enter your name here