Home Politica Gobierno ta admiti cu tin limitacion na nos capacidad di carga

Gobierno ta admiti cu tin limitacion na nos capacidad di carga

50
0
SHARE
- Advertisement -

Booshi Wever di UPP:

ORANJESTAD (AAN): Segun drs. Booshi Wever, cu hopi atencion partido UPP a sigui e conferencia di prensa di gobierno di dialuna 6 di mei. A trata e topico di e ilegalnan Venezolano cu den fin di siman a worde laga liber pasobra a pidi asilo politico.

Den pueblo esaki a trece basta consternacion, vooral ora cu minister di Husticia den weekend a declara cu gobierno lo respeta e decision di Corte pa laga ilegalnan bay. Despues nos por a scucha Corte duna un reaccion cu un otro contenido. Corte a indica cu no por expulsa e grupo di Venezolano ilegal si ainda mester tramita nan peticion pa asilo politico.

Loke a resalta durante e conferencia di prensa, unda Minister Presidente y minister di Husticia tabata presente, tabata e declaracion di ambos pa loke ta e situacion di Aruba su grandura y capacidad pa atende cu e diferente problemanan cu mas migracion lo por trece pa Aruba. Ambos a subraya e situacion cu Aruba ta atravesando. Un situacion hopi dificil y p’esey Aruba no por sigui carga cu e problemanan di otro pais. Ambos a mustra cu ta tempo pa nos pensa riba Aruba prome, pasobra niun otro lo pensa ariba Aruba. Esaki ta hustamente loke UPP a bin ta vocifera desde su lantamento, pero cu no tabata worde aprecia y incluso a worde critica severamente.

Aruba no ta un solucion tampoco pa esnan cu ta bin Aruba ilegalmente en busca di un mihor porvenir,  segun Minister Presidente, pasobra “na Aruba nos mes tin nos mesun retonan, nos tin desempleo, nos tin problemanan social y nos tin problemanan di vivienda.” Pues e ta pidi pa nos keda trankil y pa ban pensa riba Aruba Prome. Sigur nos di UPP ta sostene e pensamento aki, es mas nos ta contento, aunke laat, ta bin realisa cu e situacion ta serio.

Y minister di Husticia ta bay un tiki mas leu, ora cu e ta declara, cu: “e señal cu nos kier duna ta, cu Aruba no ta e lugar, e paraiso comosifuera cu nan ta pretende cu e lo ta, cu ora nan bin akinan, cu bo tin aceso liber na nos pais. Nos pais tin 116.000 habitante oficial registra, nos schoolnan, nos infrastructura, nos superficie ta limita. No obstante tur e lasonan historico y familiar cu Venezuela, nos no por adopta problemanan social di otro pais. Esey ta e mensahe, nos como gobierno di Aruba ta, pa nos pone nos pueblo y Aruba prome.” Pues aki minister di Husticia y gobierno ta reconoce cu Aruba ta na su limite di su capacidad di carga.

Pakico e declaracionnan aki ta importante? Un dicho cu Minister Presidente sa usa frecuentemente ta cu su gobiernio “lo bisa loke ta bay haci y haci loke ta bisa”. Esey lo nifica anto cu lo mester bay sera nos fronteranan? UPP pa añanan a bin ta adverti tanto nos pueblo como e mundo politico y gobierno cu e situacion socio-economico di Aruba no ta permiti pa sin mas aumenta e cantidad di habitante y vooral no permiti importacion di pobreza riba nos Isla.

Un asunto cu mas organizacionnan aki na Aruba a purba na atende, pero cu parce no por haya oido. E declaracionnan aki di ambos minister lo mester tin consecuencia directo pa e maneho di gobierno, pasobra e ponencia di cu Aruba ta na su limite di carga  ta conta tambe pa e mega proyectonan di hotel cu gobierno ta cooperando cu n’e na e momentonan aki.

Na momento cu un gobierno ta usa e tema di asilo pa supuesto refugiadonan como un motibo di preocupacion, esta cu Aruba no ta un paraiso, cu nos schoolnan ta na nan limite, cu nos tin problemanan social grandi, etc. debi cu nos espacio tambe ta na su limite, anto ta referi directamente na nos “capacidad di carga”.

Y si gobierno ta admiti cu nos a yega na nos capacidad di carga, anto nos no ta comprende pakico ta scohe pa e rumbo di sigui desaroya Aruba cu mas proyectonan hotelero of mihor bisa cu proyecto cu ta “labor intensivo” of “labor di man” di cual mayoria di e puestonan aki lo ta ocupa pa asina yama trahadonan “low skilled”. Cu e declaracion aki nos ta spera cu gobierno actua na un forma mas diligente y consistente y cu gobierno mira cu e mesun peliger cu nan ta mira awor aki cu yegada di mas hende pa un motibo politico den nos region, cu nan por realisa cu esaki tambe ta conta ora cu nos kier sigui desaroya Aruba cu simplemente mas construccion di hotel.

E ta hopi simpel; VOL= VOL!!!

- Advertisement -

DUNA COMENTARIO

Please enter your comment!
Please enter your name here