ORANJESTAD (AAN): E topico di asilo politico tin Gobierno bastante ocupa.
Durante un conferencia di prensa Dialuna, Prome Minister Evelyn Wever Croes y Minister di Husticia Andin Bikker a papia riba ultimo desaroyonan rond di e tema aki.
Prome Minister a indica cu e tema ta hopi importante y delicado.
“Mi kier enfatiza cu e situacion cu Aruba ta pasando aden, e impacto di e crisis di Venezuela riba Aruba ta un impacto serio”.
“E tin nos gabinete hopi ocupa, unda cu hopi atencion y energia ta bay na dje”.
“Na Aruba nos tin lasonan historico familiar y economico cu Venezuela y nos ta convivi cu e situacion na Venezuela”.
“Ohala nos por yuda mas, pero na e momentonan aki nos mester pensa riba Aruba prome”.
“Si nos no pensa riba Aruba, ningun hende ta pensa riba Aruba pa nos”.
Esaki segun Wever Croes, kende a indica cu e impacto cada dia ta birando mas grandi.
Minister Bikker tambe a hiba palabra.
El a splica cu ora cu e gobierno nobo a sinta, nan a topa cu un situacion sin precedente.
“E tempo ey Aruba tabata haya un average di 1 of 2 aplicacion di asilo pa aña”.
“Ora cu Aruba a haya su Status Aparte na 1986, nos a bira parti di e tratado internacional di refugiado”.
“Ningun hende por a pensa cu lo bay tin un situacion di refugiado, manera cu tin aworaki”.
Esaki segun e mandatario, kende a sigui bisa cu na Mei 2018 varios hende a cuminza hasi uso di e tratado, pa den desesperacion aplica pa asilo.
“Door cu esaki tabata sin precedente nos a hasi un estudio un rato riba kico mester tuma lugar”.
“Entre otro nos a constata cu den e LTU cu tabata tin 2011/2012 den Parlamento ningun cambio a wordo hasi”.
“Nos a bay Parlamento y riba prome di December nos a bin cu basenan huridico, pa loke ta trata entre otro e tratadonan internacional”.
“Los di esey nos a bay pa cambia e maneho y nos a encamina e proceso pa nos por adapta articulo 19 di e asina yama ‘Toelatingsbesluit’”.
Esaki segun e mandatario di Husticia, kende a sigui bisa cu e tematica di Venezuela ta tumando masha hopi tempo mas.
“Nos a hasi e proceso pa articulo 19 wordo cambia y recientemente nos a haya e conseho di Raad van Advies”.
“Nos ta spera cu pa fin di siman aki nos por conclui e proceso aki”, segun Bikker.
E Minister a sigui bisa cu Diabierna Huez Comisario a dicidi di laga den libertad e personanan cu a yega Aruba den boto na un manera ilegal.
E Huez Comisario a indica cu si e personanan aki pidi asilo, a base di e tratado nan tin cu wordo duna un asina yama meld plicht.
“Esey a causa hopi conmocion den nos comunidad y no obstante esey nos a respeta y a cumpli cu e decision di corte”.
“Diasabra di biaha urgentemente nos a reuni cu tur e servicionan cu ta atende cu e problematica di asilo y nos a delinea e ora ey kico ta e pasonan cu nos ta bay tuma”.
Esaki segun Bikker, kende a papia di e asina yama Schiphol Model cu tin na Hulanda, unda cu den e prome 8 dianan cu un persona pidi pa asilo, nan ta screen si e persona tin derecho legitimo y merito pa pidi asilo.
E mandatario ta pensando pa bin cu e Schiphol Model pa Aruba, pasobra tin varios aplicacion di Mei 2018 bin ariba.
“Nos a bin ripara cu gran mayoria di e peticionnan, nan ta hasi uso indebido di e proceso di asilo y di e tratado”.
“Gran mayoria di e personanan a aplica pa asilo, pero ora cu nan a wordo gara ta traha ilegalmente un caminda”.
Esaki segun Bikker, kende a indica cu tin personanan cu for di 2016 of 2017 caba tabata na Aruba y esaki ta un indicacion cu quizas no berdaderamente nan tabata tin mester di asilo.
Pesey Gobierno di Aruba cu ayudo di Hulanda algun tempo atras a train un grupo di 10 persona pa diariamente nan atende cu y procesa e aplicacionnan na un manera rapido y responsabel.
Nan tarea ta pa wak cua di e personanan aki legitimamente tin e derecho di aplica pa e tratado y cua ta aplica djis pa alarga nan estadia na Aruba.
DIARIO a puntra Bikker kico ta algun di e puntonan cu ta wordo controla.
El a splica por ehempel cu si un persona di Venezuela coi un avion y bay Colombia y for di eynan e ta bin Aruba y ta pidi asilo, esey no ta cuadra.
Si e persona di berdad tabata tin mester di asilo e por a hasi esaki na Colombia mes cu tambe ta un pais liber.
