Home Hudicial Hof a subi castigo di 15 pa 18 aña pa Gabriel Martin...

Hof a subi castigo di 15 pa 18 aña pa Gabriel Martin cu a mata muchanan Eugene y Rishandroh

1940
0
SHARE
— Aunke O.M. a bolbe pidi pa 15 aña, Corte Superior a dal sentencia di 18 aña.
- Advertisement -

ORANJESTAD (AAN): Dialuna merdia Hof di Corte Superior a dicta sentencia den e apelacion di Gabriel Martin contra su condena di 15 aña di prison. Tratamento di e caso a tuma lugar 15 di April 2019, caminda Procurador General interino (PG) a bisa Hof cu e ta haya Gabriel culpable y a pidi pa confirma e sentencia di 15 aña di prison y despues TBS cu ta encera tratamento medico obligatorio den un institucion sera.

 CONSENSHI TA REMORDE:

Luna pasa durante tratamento di e caso diferente biaha Gabriel no ta duna contesta manera Hof ta spera. Esey a haci cu president di Hof a remarca na Gabriel cu e ta duna impresion cu e no ta interesa riba e caso y no kier duna contesta.

President di Hof a hala su atencion cu e mester realisa cu ta su apelacion y e mester duna contesta. E ta duna impresion cu ora Hof haci pregunta, ta molesti’e. Gabriel a bisa Hof cu e kier lubida di e caso y awor cu ta papia di e caso e ta molesti’e. Hof a bisa cu por compronde esey pero ta spera cu e ta duna contesta drechi.

MATA Y DERA MUCHA:

Hof a mustra cu dia 22 November 2017, Rishandroh Anatasia (5) a worde hiba Hospital na Playa pa su mama R.F.  Docternan cu a atende e mucha a constata maltrato severo. E mama R.F. a bisa cu e mucha a cay pero e dokternan no a keda.

Mesora a notifica Polis, Voogdijraad. Ta asina cu dia 24 November 2017, Rishandroh a fayece. E ora ey a constata cu su otro ruman Eugene (3) no tey. A detene R.F. y Gabriel y despues di investigacion profundo a bin haya e restonan di Eugene dera den mondi na Savaneta.

Autopsia a mustra cu Eugene a worde mata na September 2017 y no October 2017 manera Gabriel a bisa. Tambe a constata cu ambos mucha tabatin fracturanan na nan curpa cu ta mustra cu nan tabata worde maltrata severamente

Autopsia ta mustra cu e mucha Eugene a sufri lesion pisa na cabez cu a causa su morto.

Gabriel a bisa cu el a dal Eugene duro na cabez cu consecuencia cu Eugene di 3 aña a dal su cabez contra toilet y fayece. Despues a bay dera e mucha den mondi na Savaneta. Hof a mustra cu Gabriel a admiti di a maltrata e muchanan.

Hof puntra Gabriel kico tabata motibo cu a maltrata e muchanan. Gabriel a bisa cu awor e ta realiza cu el a bay di mas. Hof a haci un serie di preguntanan na Gabriel pero el a bisa cu el a duna declaracion amplio y no kier bay papia atrobe ariba e cosnan aki. A papia con el a kima Rishandroh cu awa cayente y cigaria y Gabriel no kier duna mucho cos. El a bisa cu el a bay basha awa cayente pasobra e wc a pega y awa a cay riba e mucha. Hof a puntra pakico no a hiba e mucha dokter. Hof a remarca cu Gabriel no a hiba e mucha pa tratamento siendo cu e mucha a sufri kima serio.

Hof a puntra Gabriel pakico e no a bay busca ayudo. Gabriel a puntra con? Hof a remarca con por ta cu e ta bay dal mucha di 3 y 5 aña di e forma aki. Algo no ta bon! Tempo di e incidente e tabatin 5 aña bibando na Aruba.

Hof a mustra cu Gabriel mester bebe remedi pa su problema mental pero e no tabata bebe esakinan. Reclasering den su raport ta teme cu Gabriel lo bolbe ripiti mesun acto. Psycologo den su raport ta constata cu Gabriel tin problema di paranoide y cu Gabriel no por sin marihuana.

El a conclui cu Gabriel no ta responsabel pa su actonan y teme cu e lo ripiti su acto. Psychiater a constata cu Gabriel tin problema mental cu sintomanan di psycopata. Psychiater ta haya Gabriel ta leve menos responsabel y cu mester TBS y den un institucion.

HOF A SUBI CASTIGO:

Dialuna merdia Hof a dicta sentencia caminda Hof a subi e castigo. PG a exigi 15 aña y ayera Hof a dicta cu Gabriel Martin ta culpable di a mata e rumannan Eugene y Rishandroh.

Hof a condena Gabriel Martin na 18 aña di prison y cu e TBS ta keda. Esey ta nifica cu Gabriel Martin lo mester bay un institucion pa haya tratamento psychiatrico, despues cu a sinta gran parti di su castigo.

- Advertisement -

DUNA COMENTARIO

Please enter your comment!
Please enter your name here