Home CORTE Homber a dal otro mokete den cara y kibra kaak den dos

Homber a dal otro mokete den cara y kibra kaak den dos

28
0
SHARE
- Advertisement -

Pa motibo di jaloersi

ORANJESTAD (AAN): E homber J.K. a admiti den Corte cu el a dal e homber M. mokete den cara y consecuencia di esaki tabata cu M. a sufri fractura serio na su kaak. E mester a bay Colombia pa haci operacion y asina mes su kaak no a keda bon. Door di e sla duro e kaak a kibra den dos. Tur esaki pa motibo di jaloersi.

    MALTRATO DOOR DI JALOERSI:

Fiscal a bisa Hues cu e acusacion contra J.K. ta cu dia 8 October 2017, el a maltrata e homber M. cu mokete cu a causa cu M. su kaak a kibra. Fiscal ta considera esaki, maltrato cu consecuencia severo.

Hues a puntra J.K. si ta berdad y el a admiti. Hues a mustra cu tin denuncia di M. cu e tabata marduga hunto cu su amiga caminda nan a bay fiesta y despues bay cas di e amiga cu ta ex-amiga di J.K. Ora el a bay pa drenta e cas patras el a mira un sombra y despues a sinta un sla duro na cara. El a sinti cu su kaak a kibra. El a defende su mes pero a bay suela. Ora el a lanta el a mira J.K. ta lucha cu e ex amiga. E ora ey el a haya chens di core bay. El a bay ImSan cu a constata cu e kaak a kibra den dos caminda.

Esey a haci cu M. mester a bay Colombia pa drecha su kaak. AZV a cubri e gastonan pa M. bay Colombia. M. ta haci demanda di daño. E kier cubri gastonan di viahe di su mama for di Hulanda pa Aruba pa viaha cun’e pa Colombiano. Mas cu 3 mil Euro. Tambe el a demanda cu su cachete a keda di banda. Tambe el a demanda pa 3 luna sin traha. En total 25 mil Florin.

   PAREHA TA BON BACK CU OTRO:

Hues a mustra cu e ex amiga a bisa cu el a haya un miss call di M. ora el a drenta cas. El a bay pafor y mira J.K. tabata maltrata M. El a wanta J.K. y bisa M. pa bay. E ex amiga a bisa Polis cu e no tin relacion mas cu J.K. pero J.K. no kier acepta. Nan tin un yiu muher hunto.

Hues a remarca cu no ta manera cu J.K. ta bay marduga e cas pa wak su yiu. E mester regla esaki via Voogdijraad. Segun J.K. e tin algun dia ta yama pa wak su yiu pero no ta haya reaccion di su ex. Patras di cas J.K. a dal M. Hues a puntra pakico J.K. a bringa. Segun J.K., el a pusha M. y M. a bin back riba dje y e ora ey a dal’e. El a keda 10 dia sera pa e caso aki.

Durante e puntramento di Hues, J.K. a bisa Hues cu e ex ta cun’e y awor na ta bibando na cas di mayornan di J.K.

   EXIGENCIA DI FISCAL:

Fiscal ta haya legalmente proba cu J.K. a maltrata M. severamente. Tin raport medico cu ta mustra cu e victima a kibra su kaak. Fiscal a splica cu segun Corte Supremo, ora ta papia di kibra y cu operacion ta necesario, ta considera esaki maltrato severo. E cara di un persona ta hopi fragil. Ora dal cu forza na cara di hende, por occasiona daño severo.

Fiscal ta haya cu J.K. a dal M. hopi duro pa kibra e kaak na dos caminda. Fiscal a tuma J.K. na malo cu door di jaloersi a dal e homber M. El a tene cuenta cu ta promer biaha J.K. ta cay sera pa un delito asina. Mirando e gravedad di e caso, Fiscal a exigi trabao pa comunidad di 200 ora of 100 dia sera. Tambe Fiscal a exigi 4 luna di prison condicional cu un tempo di prueba di 2 aña.

Demanda di daño di 3 mil pa e mama ta suficiente cla pero no cu un otro persona tambe mester a bay. E ta haya e demanda di daño inmaterial no suficiente argumenta pa demanda 25 mil Florin. Fiscal a pidi Hues pa declara e demanda no admisibel y pa aproba 4 mil Florin.

   ABOGADO:

Abogado mr. Zara a bisa Hues cu tin suficiente prueba cu su cliente J.K. a dal M. El a bisa cu e exigencia di Fiscal ta pone cu J.K. no tin cu bay back KIA. E sospechoso por biba cu esey. Sinembargo e demanda di daño material, por hustifica e gasto di ticket di viahe. E abogado ta comparti punto di bista di Fiscal pakico un hende mas mester a bay. Demanda inmaterial, Fiscal ta haya 4 mil Florin na su lugar y e resto ta no admisibel. E abogado ta haya cu mester tene cuenta cu situacion financiero di J.K. El a bolbe cu su ex y e no tin trabao fiho. El a pidi Hues pa tene cuenta cu esaki.

SENTENCIA

Hues a sera tratamento di e caso y a dicta sentencia di biaha. Hues a bisa cu e ta haya legalmente proba cu J.K. a maltrata M. intencional. Pa cu e castigo, Hues a bisa cu e ta tene cuenta cu ta promer biaha y cu ta un herida severo e victima a sufri. Hues a tene cuenta cu ta basta tempo pasa e caso aki a sosode y tambe a tene cuenta cu sentencia cu Corte sa duna. Hues a confirma un parti di exigencia di Fiscal, esta e parti di castigo. Pa loke ta e demanda, Hues ta haya no bon argumenta e demanda di daño. No por saca afor cu ta M. mes a paga pasashi di su mama. Tampoco no tin mucho claridad riba daño inmaterial. Hues a aproba 2 mil Florin di daño inmaterial, cu J.K. mester paga.

- Advertisement -

DUNA COMENTARIO

Please enter your comment!
Please enter your name here