Home Deporte Honor grandi pa Nando Maduro den Campeonato Heineken Fast Pitch

Honor grandi pa Nando Maduro den Campeonato Heineken Fast Pitch

95
0
SHARE
- Advertisement -

ORANJESTAD (AAN): Campeonato Heineken fast pitch di Aruba Softball Bond a inicia recien. Manera costumber ASB ta reconose, honra, homenagea y dedica e campeonato na dos persona kendenan a destaca den deporte general primordialmente e deporte di softball.

E aña aki decision unanime a cay unda Aruba Softball Bond ta dedica  campeonato 2019 na Jacobo Jansen y Gilbert Rolando mihor conosi  como “Nando” Maduro. Awe nos lo cubri e CV di Nando Maduro. Nando a nace dia 3 di november 1961.

Nando Maduro tin felismente 33 aña casa cu Susana Maduro alaves nan tin dos yiu muher y un yiu homber.  Nando a cuminsa hunga baseball den Little League na aña 72, pues cu 11 aña.

Despues di a hunga den little, junior y senior division Nando a cuminsa hunga softball cu Astros bao guia di Ronny Gomez. Cu e mesun equipo aki el a pasa tambe pa e campeonato di softball organiza y a hunga cu e mesun organizacion bao nomber di Athletics Seguros Aponte den diferente campeonato di Aruba Softball Bond.

Cu e equipo aki el a hunga den Liga Kwihi y despues den Liga Kibrahacha cu e tempo ey tabata e categoria di mas halto esta categoria AA di softball na Aruba. Cu e equipo aki el a bira campeon di Aruba diferente ocasion.

Pitchernan estelar di nan equipo manera Danny Gomez, Adolfo Gonzalez y Orlando Albus, den feliz memoria ta esnan cu tabata carga e equipo. Den Liga Kwihi cual tabata A-Klas su equipo  a ser maneha pa Mando Irausquin y Ronny Gomez.

    Gilbert Nando Maduro ta logra 7 titulo den Copa ABC:

Nando su logronan mas grandi sinembargo tabata den Bush League den Copa ABC na unda Nando y su equipo a logra 7 titulo di campeon di cual 5 den forma consecutivo. Mester remarca cu Atros Amstelito nunca a bay hunga reforza y semper a hunga cu su propio hungadornan cu tabata di e mesun bario di San Nicolas.

   Nando Maduro ainda activo cu titulo den Liga 50:

Nando Maduro actualmente ta milita den Liga 50 cu su organizacion di Astros. E team ta bayendo hopi bon ya cu na aña 2017 y 2018 nan a titula campeon di Liga Mayor. Tambe nan a bira campeon di e torneo di Aruba Jrs esta Copa Himno y Bandera 18 Maart y tambe di e torneo “Nilo Swaen”.

E aña aki Astros a titula campeon di e torneo organiza pa Bambino riba 18 di maart. Nando ta bon conoci riba su posicionnan di tercera y catcher di su equipo.  Nando poko poko ta brindando mas aporte dunando un man di ayudo den organizacion, asina  Nando a tuma un puesto den directiva di Liga Mayor Aruba.

   Nando Maduro su carera como softbolista:

Den su carera como softbolista Nando a hunga cu diferente team tanto aki na Aruba como den exterior. Nando a yega di hunga cu equipo Que Hiciste y tambe cu Aruba Jrs. Despues el a hunga cu Kenro Jewelers. Nando a hunga na Hulanda cu Aruba Stars durante un vacacion aya na tera friu.

Tambe Nando a yega di bay campeonato mundial di softball na Hialeah, Miami. Cu un equipo di famia y amigo, esta Friends Nando a hunga na Puerto Rico. Den Copa ABC Nando a hunga na Curaçao, na Bonaire y Sint Maarten na multiple ocasion. Ademas el a hunga na Republica Dominicana y na Merca.

   Aruba Softball Bond ta gradici Nando Maduro pa su aporte:

Aruba Softball Bond ta gradisi Gilbert Nando Maduro pa cu aporte incondicional brinda na deporte di softball tanto como atleta y ainda activo den liga 50. Alaves Nando a tuma responsabilidad den diriectiva di Liga 50 awor como dirigente.

Orguyosamente ASB ta dedica e campeonato 2019 na honor di Nando Maduro.  Pabien Nando y pabien na bo famia, bo senjora y yiunan y na tur otro cu a contribui pa cu bo logronan. Merecidamente campeonato 2019 dedica na baluarte Gilbert Rolando “Nando” Maduro. Pabien!!!

- Advertisement -

DUNA COMENTARIO

Please enter your comment!
Please enter your name here