Home Hudicial Hues a atende homber cu a mishi y sunchi mucha homber di...

Hues a atende homber cu a mishi y sunchi mucha homber di 13 aña

3070
0
SHARE
— Caso den Corte di Husticia na Aruba.
- Advertisement -

ORANJESTAD (AAN): Diahuebs mainta tabatin un caso hopi interesante caminda un homber tabata mishi cu un mucha homber di 13 aña y hasta a sunchi e mucha den su boca. E mucha a rabia masha y a bay conta su mama.

Ta promer biaha cu ta scucha Fiscal reclama den Corte, con mayor ta bay confia hende cu apenas nan conoce, cu nan yiu. E homber a admiti di a haci e actonan aki y a pidi dispensa. El a bisa cu no tabata su intension. Fiscal a bisa cu e no ta kere cu e homber cu no tabata su intension.

   ACTONAN INMORAL:

Fiscal a acusa e homber T. cu entre 1 Maart 2017 y 16 Juni 2017 a haci actonan inmoral cu un mucha homber di 13 aña. Den sala di Corte tabata presente e mama di e mucha y el a pidi Hues pa scucha su yiu como testigo. Hues a bisa cu a base di ley no ta permiti menor di edad y mas ainda e victima como testigo.

Hues a puntra T. si e acusacion ta berdad y si e por bisa kico a sosode. T. a bisa Hues cu el a duna su declaracion na Polis y e ta mantene esey.

Hues a mustra cu e relato di Polis ta mustra cu T., como amigo di famia, tabata por hiba e mucha actividadnan.

E mama di e mucha a haci denuncia ora el a ripara comportacion straño di su yiu y ora el a papia cu su yiu e yiu a bis’e cu T. a tene su parti intimo 5 biaha y un biaha a gara su cara tene y dun’e sunchi den boca. E yiu a bisa e mama cu el a purba kita su cara pero T. a tene duro. Esey a duna e yiu un rabia riba T.

Hues a bisa cu T. a basicamente admiti esaki na Polis. El a pidi e mama sorry. El a bisa cu el a haci esey pasobra e mucha tabata haci mucho wega di man. E ta arepenti loke el a haci. Segun T. no tabata su intension pa haci acto inmoral na e mucha.

   HUES A REACCIONA:

Hues a reacciona cu T. no tabatin e tarea di educa e mucha y mucho menos pa mishi cu e mucha. Na opinion di Hues, si e mucha tabata haci fastioso manera T. ta bisa, T. mester a bisa e mama y no bay haci cosnan inmoral asina.

Hues a bisa cu ta den comienso di aña 2017, T. a conoce e famia y a gana nan confianza. El a remarca na T., pakico no a papia cu e mama pa loke e mucha tabata haci! Hues a bisa cu e ta haya straño y incomprendibel cu T. ta bay mishi cu e mucha su parti intimo pa e ora ey e mucha para keto.

Hues a puntra e mama di e victima si e kier haci demanda di daño. E mama a lanta para y a bisa cu no ta desea di haci demanda di daño. El a bira wak e sospechoso y a bisa Hues cu e kier pa castiga T. Hues a bisa e mama cu e no ta permiti di duna opinion den tratamento di e caso.

   EXIGENCIA DI FISCAL:

Fiscal a bisa Hues cu casonan di inmoralidad ta causa hopi conmosion den comunidad. Fiscal a bisa cu e por nota esaki cerca e mama di e victima.

Fiscal ta haya legalmente proba cu T. a mishi y sunchi e mucha homber. Fiscal a remarca cu ta incomprendibel cu T. tabata haci esaki pa corigi e mucha di 13 aña cu tabata haci fastioso.

El a bisa Hues cu ta promer biaha cu e ta scucha algo asina. Na opinion di Fiscal, no ta importante e hecho cu T. a bisa cu no tabata su intension. Fiscal ta haya cu T. a obliga e mucha pa e sunchi na su boca, a tene diferente biaha e mucha su parti intimo. Esaki ta castigabel.

   FISCAL RECLAMA MAYOR:

Fiscal a bisa Hues cu e tin cu expresa algo cu tin’e hopi molestia. Fiscal a bisa cu e ta haya straño cu den un periodo asina cortico e mayor ta confia e homber T. cu su yiu.

Fiscal ta haya cu T. a abusa di confianza cu mayornan a dun’e y tambe e confianza cu e victima tabatin den dje.

   CASTIGO:

Fiscal a bisa cu T. a tacha integridad di e mucha. Esaki por afecta e mucha. El a tene cuenta cu e incidente aki a sosode na 2017 y a exigi 120 ora di trabao pa comunidad y si no cumpli cu esaki, e lo mester bay 60 dia sera. Tambe Fiscal a exigi 2 luna di prison condicional cu un tempo di prueba 2 aña.

  1. m Emerencia a bisa Hues cu casonan asina no ta facil y tambe casonan asina no ta igual. E abogado a mustra cu temponan a cambia. El a mustra cu antes e disciplina tabata hopi pisa y a mustra con el a worde lanta. Na Aruba ainda tin e manera disciplinario.

Abogado ta haya cu mester mira e circumstancia y si realmente por papia aki di inmoral. E ta haya cu e intension di e mishimento ta importante si ta inmoral of no. Mester tin e intension sexual pa papia di inmoral. No tur caso ta mesun cos. E abogado a menciona diferente sentencianan di Corte Supremo cu ta mustra cu no ta inmoral pasobra no tabatin e intension sexual.

Pa loke ta e caso actual, e abogado ta haya cu no tabatin intension sexual y pesey ta haya cu no ta inmoral.

Na opinion di mr. Emerencia, aki ta wega di man cu a bay for di man. T. nunca antes tabatin problema cu muchanan. E abogado a bisa cu contrario na Hues y Fiscal, e ta haya cu tur adulto tin un obligacion pa actua corectivo cu menor di edad y no mester warda te ora cos bay for di man.

El a bisa cu T., door di mishi na parti intimo di e mucha, a ripara cu e mucha ta para keto cu wega di man. El a dicidi cu e ta haci esey cada vez cu e mucha tabata haci fastioso cu weganan di man. E abogado a bisa Hues cu no tabatin intension sexual di parti di T. T. a realiza cu loke e tabata haci no tabata corecto. E ta pidi disculpa na mayor pasobra no tabata su intension.

   SENTENCIA:

Hues a sera tratamento di e caso y a dicta sentencia di biaha. Hues a bisa cu e ta haya legalmente proba cu T. a haci actonan inmoral cu e mucha homber di 13 aña. A mishi/tene e mucha na su parti intimo diferente biaha y a sunchi den boca. Hues ta haya no ta aceptabel loke T. a haci.

El a mustra cu T. tabata un amigo di famia y no por acepta cu ta bay tene e mucha su parti intimo y sunchi e mucha na boca. Hues ta haya e castigo exigi pa Fiscal corecto. Hues a condena T. na 120 ora di trabao pa comunidad y si no cumpli e lo mester bay 60 dia sera. Tambe Hues a condena T. na 2 luna di prison condicional cu un tempo di prueba di 2 aña.

- Advertisement -

DUNA COMENTARIO

Please enter your comment!
Please enter your name here