Home Hudicial Hues a shock tur hende mustrando potret saca di baby di 2...

Hues a shock tur hende mustrando potret saca di baby di 2 aña cu arma di candela

5397
0
SHARE
— A haya potret den smartphone di muher cu ta complice den atraco riba Well Done Snacktruck.
- Advertisement -

ORANJESTAD (AAN): Practicamente tur hende den sala di Corte a bay den shock y reacciona ora Hues a mustra un muher di 23 aña (sospechoso di un serie di asalto arma), cu a haya un potret den su smartphone di su baby di 2 aña cu un arma di candela.

E muher a bisa Hues cu e mes no tabata sa di e potret ey te na e momento cu miembronan di Recherche a mustr’e. E ta sospecha cu su ex amigo, un otro sospechoso di serie di caso di asalto arma, a saca e potret ey ya cu e arma ta esun di e ex-amigo J.R.

   BABY RECIEN NACI DEN CORTE:

E muher J.D. a presenta Diabierna mainta den Corte cu su baby recien naci pa e caso penal cu Ministerio Publico a cuminsa contra dje.  E ta envolvi den varios caso di atraco na September aña pasa, riba e.o. The Terrace na Ritz Savaneta, na Shap Convenience Store na Shiribana, y tambe na Well Done Snack Truck II banda di Linear Park, unda nan a bay cu 9.000 Florin.

Ta asina cu momento cu e muher a worde deteni aña pasa, e tabata na estado y a worde laga liber. Recien el a haya yiu.

E muher ta forma parti di un grupo di cuater sospechoso, kendenan ta worde sospecha di un serie di caso di asalto arma. J.D. a bay Corte cu su mama, kende tabata keda cu e baby pafor di sala di Corte y cada pasa un rato, J.D. tabata sali for di sala di Corte pa asina e por bay duna su baby pecho.

Tratamento di e caso tabata masha largo mes. Di mainta te den oranan di atardi, caminda Hues a señala diferente asunto di preocupacion.

   MUHER NA ESTADO TABATA CHAUFFEUR DI ASALTO:

Un di e puntonan tabata cu durante e investigacion relaciona cu un serie di 9 asalto arma, Polis a interoga e muher J.D., kende na estado, tabata e chauffeur di auto cu tabata hiba su amigo (cu kende awor e no tin relacion mas) hunto cu otronan pa diferente lugar pa haci atraco arma.

E muher durante interogacion a bisa Recherche cu e tabata bisa su amigo J.R. cu e tin dolor y pa nan bay cas pero J.R. tabata insisti cu mester caba di haci e asalto of asaltonan. Tin momento cu na October 2018, nan a haci tres asalto arma riba un dia.

   BABY CU ARMA DI CANDELA:

Loke a sorprende practicamente tur hende den sala di Corte ta e momento cu Hues a mustra cu Recherche ora tabata investiga loke tin den e smartphone di J.D., a keda den shock ora cu a descubri un potret di e baby di 2 aña di J.D. cu un arma di candela riba e imagen.

Hues mes a remarca con por ta posibel cu J.D. ta saca un potret di su yiu cu un arma di candela.

E muher J.D. a bin cu un storia, y a bisa Hues cu e no tabata sa cu e potret ey a worde saca. Hues a puntra J.D., si no ta e, kende anto a saca e potret ey.

Segun J.D., e unico hende cu tabata mishi cu su smartphone tabata su ex-amigo J.R. El a bisa Hues cu e arma di candela cu a saca cu su yiu, ta arma di J.R. El a bisa Hues cu e ta sospecha cu J.R. a saca e potret ey.

   SOSPECHOSO TA NENGA:

Den sala di Corte por a ripara cu e homber J.R. tabata tira palabra pa e muher J.D. entre otro cu e “ta gaña”.  Ta asina cu J.D. ta un di e sospechosonan cu a conta Recherche tur cos con e asaltonan arma a sosode y cu ta J.R. ta esun cu tabata arma.

E homber J.R. di otro banda ta para riba cu e no tin nada di haci cu e casonan aki y cu e muher J.D. y su primo A.R. cu tambe ta un sospechoso, tabata gaña riba dje.

Apesar cu J.R. ta para riba cu e no tin nada di haci cu e serie di asaltonan arma, su primo A.R. y su ex amiga J.D. a bisa den Corte cu J.R. tabata esun arma cu tabata bay hunto cu nan haci e asaltonan arma.

   ARMA SCONDI BAO DI MATRAS:

Un otro punto preocupante cu Hues a menciona ta cu J.R. tabata biba cerca J.D. y na dado momento a surgi un discusion ora cu J.R. a culpa familiar di J.D. di a coy su arma di candela cual e tabatin scondi bao di e matras ariba cual J.R. y J.D. tabata drumi.

Hues a puntra J.D. si e tabata sa di e arma aki. El a bisa Hues cu el a mira J.D. cu e arma pero no tabata sa cu J.R. tabatin e arma warda bou di matras di nan cama. Ora J.R. a reclama cu e arma a disparce, a surgi un discusion entre J.R. y e tata di J.D. y e tata a saca J.R. for di e cas pasobra e no ta permiti pa tin arma di candela na cas.

- Advertisement -

DUNA COMENTARIO

Please enter your comment!
Please enter your name here