Director di Ibero American School relaciona cu caso di violacion
ORANJESTAD (AAN): Director di Ibero American School, William Centeno a yama un conferencia di prensa diahuebs mainta pa asina referi na e situacion unda ta menciona un incidente na su scol.
El a bisa cu den su opinion e hecho cu algun medio di comunicacion a menciona Ibero American School sin acerk’e prome tabata algo sensacionalista. El a indica cu mester a busca haya sa di e hechonan corectamente.
Centeno a bisa cu el a prefera, cu como director di e scol, pa a contacta su persona prome cu publica algun informacion mencionando e scol pasobra cada situacion tin dos banda di medaya. E ta lamenta cu esey no a sosode.
William Centeno a expresa cu e ta spera cu e pa un proximo biaha e cosnan wordo haci na un otro manera y cu e victima den mente. Aceptando loke a sosode na e scol secundario el a agrega cu e victima a yam’e y a bise cu nunca el a sinti asina malo den henter su bida. Cu e ta sinti asina malo y cu e no kier bay scol bek.
El a remarca sa cu e asunto aki tin su atencion for di dos luna pasa. Durante e tempo aki, el a puntra pa tur conducta escolar wordo investiga. Su casa, e co-director, Ingrid Kuiperdal a realiza e investigacion y el a bisa su casa cu si e persona ta culpabel, cu e lo dispidi’e “on the spot”.
Algun tempo despues el a bisa su casa, cu a base di loke e homber a bisa y di loke e mucha muher a bisa, e comunicacion (refiriendo na e mensahenan) tabata algo no-etico, inmoral y hopi leu di e norma y balornan di e scol.
A laga sa cu el a yama e “perpetrator” mas o menos tres siman pasa y el a haci loke e mester a haci. El a despidi’e y aworaki e no ta mas parti di e staff di e scol y no ta traha mas na Ibero American School.
Centeno a enfatiza cu e homber aki no tabata un maestro na e scol. E tabata un IT Manager y el a wordo despedi, a reitera.
A sigui bisa cu Ibero American School tin 15 aña sirbiendo comunidad y e scol a wordo funda cu principionan ‘indisputable’ y nan ta demanda un moral halto di e studiantenan y nan ta demanda mescos di e docentenan.
“Mi kier bisa hopi cla cu esaki no ta un scol cu ta tolera ningun forma di inmoralidad di e studiantenan ni di e staff. Nos standard moral y nos standardnan di etica ta hopi halto y nan ta ‘indisputable’ y nos tin un historia cu por support esey”, Director Centeno a expresa.
El a agrega cu nan ta lamenta profundamente loke a sosode y nan kier pidi un disculpa publico na esnan concerni y ta spera cu e confianza cu comunidad tin den scol for di pasado por wordo reforza despues di e rueda di prensa aki.
