ORANJESTAD (AAN) – Aruba Soccer Academy ta orguyoso di anuncia un cooperacion riba area di fitness cu un trainer profesional di Hulanda cu ta traha cu atleta profesional: Iwan Redan di Beyond Yourself.
Iwan Redan ta un ex futbolista profesional cu despues di un carera di 14 aña a habri su mesun gym Beyond Yourself. Iwan ta splica cu e ta ofrece un manera nobo di training: e ta yuda e deportista pa bay mas leU cu su mesun limitenan: Beyond Yourself. E meta ta pa keda push abo mes y stop di pensa cu tin limitacion. Cu Beyond Yourself bo ta bira mas fuerte, mas fit y mas saludabel. Na Hulanda Iwan Redan ta conosi pa traha cu deportista profesional, y ta bon conosi pa su metodonan exitoso.
Hunto cu coachnan di Aruba Soccer Academy Iwan lo tey pa duna un 2-day clinic caminda e enfoke ta bay ta con pa pusha mas leu cu bo a kere bo por bay. Ta asina cu tur nivel di fitness por join, pasobra e training ta wordo adapta na cada su nivel.
Aruba Soccer Academy ta invita tur hende na Aruba pa registra lihe ya cu cupo ta limita. Probecha di e oportunidad unico aki di train bow guia di un di e fitness trainernan mas conosi na Hulanda y go Beyond Yourself! E trainings lo tuma lugar 1 di juni na Eagle Beach, por scohe entre 5 pa 6 of 6 pa 7 pm, y 2 di juni na Stadion Franklin Bareño di 7 pa 8 of 8 pa 9 pm.
