Jurette Croes, vocero di Departamento di Salud:
ORANJESTAD (AAN): Departamento di Salubridad Publico a tene nan rueda di prensa semanal unda Jurette Croes, Vocero di DVG a duna di conoce cu 12 di Mei ta Dia Mundial di Enfermeria y na Aruba ta bay celebra e siman completo.
Na Aruba hopi hende ta pensa cu enfermero of enfermera ta solamente cria of baña un pashent. “Esaki ta un pensamento eroneo y no ta solamente asina. Pero e labor di un enfermero ta un labor hopi bunita”, Croes a expresa.
Un enfermero ta yuda e pashent hopi y tambe ta encurash’e y motiv’e. Tambe scucha su dolornan. Ta un profesion unda cu e persona pa bida largo ta keda recorda bo pasobra den su momentonan mas dificil abo tabata esun cu tabata cerca di dje.
E labor di un enfermero ta hopi amplio, ya cu tambe por bay amplia den otro funcionnan manera ICU (cuido intensivo), eerste hulp, wonden poli, etc.
Pesey na Aruba ta keda encurasha e hobennan pa nan sigui e bunita profesion aki pasobra sigur mester di nan, Jurette Croes a indica.
Pa cu e siman completo aki, a agrega, Hospital lo tin diferente actividad e siman aki. Ariba esaki lo amplia den un articulo apart.
