Relaciona cu caso di pashent di cancer:
ORANJESTAD (AAN): Recientemente DIARIO a haya bishita na mesa di redaccion di Sr. Tico Valdez kende ta un pashent di cancer.
E tabata buscando algun contesta pa su caso pa motibo cu su tratamento a stop y e specialista cu tabata trata su caso a bay for di Aruba.
E no tabata sa kico ta bay pasa cu su situacion y durante e lunanan aki el a acerca AZV den busca di un contesta.
Vocero di AZV, Solange Tchong a duna di conoce cu na prome lugar e mester referi na e ley di AZV pa loke ta tratamento di pashent den exterior.
E ley di AZV ta stipula cu na momento cu cuido por wordo duna na Aruba, e prome escogencia ta bay ta esey, Tchong a remarca.
E ley tambe ta bisa cu na momento cu ta yega na e conclusion cu no por duna tratamento na Aruba ya sea por ehempel pasobra no tin ekipo of e infrastructura pa esaki, e ora ey, e ley ta permiti pa manda un asegurado di AZV den exterior pa haya cuido medico ariba e fondo di AZV.
Pa esey, a agrega, AZV ta traha cu un comision medico independiente cu yama “Commissie Grensoverschrijdende Zorg” cual ta un comision di 4 specialista medico cu ta duna AZV conseho, Solange Tchong a splica.
AZV ta tuma e consehonan over pasobra AZV kier tin un comision medico independiente cu ta obhetivo y ta evalua e peticionnan cu ta drenta di tur specialista na Aruba. Den e proceso aki, e comision ta esun cu ta tuma un decision basa ariba tur informacion medico cu nan ta haya di specialista tocante e condicion di un pashent.
A sigui bisa cu nan ta evalua locual a tuma lugar na Aruba. Si en berdad tur test of examen a wordo haci akinan y ta bay busca informacion cerca e specialistanan cu a trata e pashent pa asina hunto yega na un conclusion y pa AZV haya un mihor recomendacion segun e caso di e pashent.
E PR di AZV a indica cu e comision ta tene cuenta cu hopi punto manera e condicion di e pashent mes, edad, tipo di peticion, otro malesanan, entre otro.
Relaciona cu e caso di Sr. Valdez, el a busca prensa pa trece su caso den luz publico y e tempo ey AZV a duna un splicacion y aworaki ta bolbe duna un.
Na December 2018, AZV a evalua e caso di Sr. Tico Valdez di biaha, a señala. E mesun comision medico independiente a percura pa evalua su caso y a yega na e conclusion cu e tratamento medico ta posibel na Aruba.
A bay over na ofrece esaki na Sr. Valdez, kende na prome instante no tabata mucho di acuerdo pero AZV a percura pa nan consehero medico papia cune y splik’e e situacion.
Algun luna despues, por a constata cu Valdez a tuma su tratamento akinan y awor ta bin ariba mesa un otro peticion cu a bin ariba mesa. Esaki ta den evaluacion y un decision a wordo tuma, e vocero di AZV a indica.
