ORANJESTAD (AAN): Recientemente Hospital a eligi nan empleado di luna di maart, esta Marion Franken di e departamento di Facturatie & Debiteurenbeheer. Coleganan a bini hunto pa sorprende Marion Franken den un ambiente masha ameno.
Director di Cuido di Hospital, sr. Ezzard Cilié, a felicita Marion cu su nombramento como empleado di luna y p’e bon trabao cu e ta haciendo durante hopi aña caba.
Marion Franken, den funcion di medewerker Facturatie & Debiteurenbeheer no a spera mes cu su coleganan a nomine pa ta empleado di luna. El a bisa cu esaki tabata un sorpresa masha grandi. E trabao cu Marion ta haci ta yena di reto, pasobra cada biaha ta topa cu diferente pashent y ta depende di nan estado y situacion. Tin biaha nan ta haya zundra di cliente, pero ta keda haci nan esfuerso pa yuda nan den e miho forma posibel.
Señora Elaine Geerman, Manager di inkoop & logistiek, a duna di conoce cu e ta hopi contento y ta gradici Hunta di Directiva di a aproba e nominacion di Marion Franken. El a traha cu Marion den un otro departamento di financien como su manager y den un tempo corto Marion a siña e trabao y a ahusta mes bon. Den un tempo relativamente corto, Marion a siña su trabao nobo na unda el a adapta su mes lihe na e cambionan. E tin un entusiasmo enorme y hopi energia positivo cu colega rond di dje ta sinti durante su presencia. E ta keda al caso pero toch cu comprension ora tin situacionnan dificil cu mester comunica cu pashent of famia. E ta ‘straight forward’ y pues hopi cla den su comunicacion na otro. Tambe Marion ta un colega responsabel y lo keda si mester despues di ora di trabao pa caba cu algo importante. Ademas di tur esaki, e ta esun cu ta organiza actividadnan social p’e departamento.
Pabien Marion cu e bunita reconocimento aki!
