Dr. Steven Croes di IBiSA
ORANJESTAD (AAN): Dr. Steven Croes ta traha na IBiSA y el a duna di conoce cu nan ta bezig for di varios siman caba cu un campaña di midimento di presion.
El a enfatiza ariba e importancia di haci chekeo di salud ya cu e malesa di presion halto ta generalmente un malesa silencioso, cu no ta presenta sintomanan.
Tin hende cu ta bay docter y ta bisa cu nan no ta sinti nada. Y ta resulta ta problema cu presion nan tin. Esey ta e creencia cu kier kibra. Pueblo mester ta conciente cu apesar cu no ta sinti nada por ta sufriendo di e malesa aki, Dr. Croes a indica.
Pesey e invitacion pa haci e screening ta hopi importante. Hopi persona cu tin problema cu presion tin di haber cu nan no ta tuma nan remedi manera nan mester tuma.
Steven Croes a remarca cu si bo ta un persona cu ta sufri di presion pa continua e tratamento medico. Si kier cambia e tratamento esaki mester tin aprobacion di e doctor di cas.
Tin dos tipo di remedi, a bisa. Esunnan cu tin un nomber comercial y e genericonan cu ta ta remedinan mas barata. A agrega cu pa un remedi generico por ta ariba mercado e mester tin e mesun structura kimico cu un remedi comercial.
Tin e creencia cu e remedinan generico no ta sirbi. Nan ta sirbi pero nan mester tin e mesun structura kimico cu un remedi comercial. Ademas, mester bebe e remedinan manera nan ta wordo prescribi pa e doctor, a remarca.
Unbez un persona ta wordo diagnostica cu presion halto, si bo ta bebiendo remedinan, no kiermen cu bo tin cu laga un banda e control di e presion. Mester corda cu tur malesa ta progresivo y si no cumpli cu locual a wordo prescribi e presion no lo ta bao control.
E pashentnan cu ta bebe nan remedinan regularmente mester check nan presion, a señala.
Segun Dr. Croes, durante e campañanan di screening a keda evidencia cu tin hopi hende, a pesar cu nan ta bebe nan remedi, cu keto bay tin presion halto y esaki tin di haber cu e progreso di e malesa.
Den e casonan aki ta aconseha pa bay cerca e docter di cas y splike cu apesar cu bo ta bebiendo remedi y cu ta siguiendo su recomendacion tog bo tin presion halto. E ora tin cu evalua e necesidad di adapta e terapia.
Por pensa cu e remedi no ta traha pero e malesa ta progresa y e terapia mester wordo adapta segun e numbernan cu tin e momentonan ey.
Ta ideal pa e personanan cu ta sufri e malesa aki pa hunto cu e docter di cas por controla e riñonnan, wak con nan ta trahando. Esaki por wordo haci al menos un biaha pa aña.
Pa loke ta nutricion y actividad fisico a agrega cu esaki mester wordo mira di un forma integral. Ademas di e remedinan mester cambia e estilo di bida.
E dieet mester ta uno abao den salo y den vet, pero rico den potasio. Hidratacion ta importante, maneho di stress como tambe humamento y bebemento, cual ta preferibel elimin’e, Dr. Croes a expresa.
