ORANJESTAD (AAN)- Diadomingo cu a pasa tabata e fecha natal di Roland Thijssen, ex presidente di Mustang Club. Y pa recorda e fecha aki miembronan di Mustang Club Aruba a tene un recorido rond Aruba unda cu Sr. Thijssen tabata gusta core cu su Mustang.
Loke a haci di e dia aki mas emocional, tabata ora a mira e Mustang di Sr. Thijssen yega na e sitio pa tambe ta parti di e parada. Por a compronde cu un paar di dia prome cu Sr. Thijssen a fayece, e auto a para y no kier a core mas. Pero entre e yiunan y algun miembro, a bay over pa drecha e motor y tabata diasabra marduga e motor a start y asina a dicidi di habri e parada cune, manera cu semper tabata e custumber, tempo Roland tabata na bida. Na momento cu e Mustang aki a core yega Linear Park por a mira e alegria un biaha mas riba cara di e coredornan. Por a compronde cu pa colega Hubert Tiel di Speedworld kende tabata un bon amigo di Sr. Thijssen, kende kizas tabata e ultimo persona cu a bisa Roland, pa no cambia e motor di e auto no por a contene su emocion y a expresa su sentimento cu algun lagrima. Presentenan como un famia grandi di Mustang Club Aruba a pone flor riba e auto pa asina rindi honor nan ex Presidente.
