Home Enseñanza Minister Lampe a firma diferente MoU importante

Minister Lampe a firma diferente MoU importante

30
0
SHARE
- Advertisement -

*Studiantenan por uza Aruba Lening awor pa studia na Merca

ORANJESTAD (AAN): Dialuna Minister di Enseñanza, Ciencia y Desaroyo Sostenible Rudy Lampe a papia riba diferente logro y diferente proyecto cu tin na caminda.

Segun Lampe, recientemente a firma un MoU cu Stichting Rancho.

“Nos intencion ta pa duna un realce na e parti di historia den nos sistema di educacion, cu tur loke ta piscamento a nifica pa nos, pero tambe nos lo kier promove e profesion di piscador atrobe dentro di nos sistema di enseñanza pa futuro generacionnan”.
Esaki segun e mandatario, kende a indica cu el a caba di bin bek di apertura di un conferencia internacional organiza pa UNESCO Aruba, tocante e problematica di laman.

“Nos tur sa cu Nacionnan Uni ta bay declara 2021 pa 2030 e decada di Ciencia di Oceano”.

“E autoridadnan ta na Aruba caba”.

“E Gobierno aki ta tuma na serio e retonan cu nos ta enfrenta, di entre otro e rif di coral etc.”, segun Lampe.

“Nos tur sa cu turismo tin un parti contaminante pa nos oceano, pero nos ta biba di turismo, nos ta biba di laman y nos ta biba di e beach, pues un di e topiconan importante den e conferencia internacional ta tambe e efectonan cu un ‘oil spill’ por tin”, segun e minister.

El a indica cu e conferencia ta enfoca sigur riba kico laman ta nifica pa Aruba.

“Den e mesun cuadro internacional aki, nos a firma un MoU cu Wayne State University na Nebraska, pa nos studiantenan por paga un ‘fee’ local manera esnan cu ta biba den e estado ey, cu ta un 75% di rebaho di loke ta e college fee”.

“Nos ta negociando pa por hasi mescos pa nos studiantenan den otro estadonan”, segun Lampe, kende a indica cu asina lo por uza Aruba Lening pa studia na Merca tambe, locual antes no tabata posibel.

E intencion ta pa nos studiantenan por studia pues na Merca, Canada, Hulanda  etc, pa ofrece nan un futuro diferente na locual nos tabata conoce antes.

E mandatario a indica tambe cu a firma recientemente un MoU cu Leerorkest Amsterdam, unda cu e intencion ta pa introduci y promove enseñanza di musica den nos sistema di traimerdia.

“Nos ta kere cu e formacion musical ta parti di e desaroyo hopi importante di nos muchanan, pa stimula nan creatividad”, segun Lampe.

El a anuncia tambe cu a cuminza cu e proyecto yama ‘Fietsonderwijs’, unda cu un workshop a tuma lugar na IPA pa maestronan, pa nan por bira e educadornan di bicicleta dentro di nos sistema di enseñanza.

“Ta bay tin dos Pilot Project, esta un na Pius X na Dakota  y e otro ta bay ta na Filomena School na San Nicolas”.

“Nos ta bay introduci e amor pa bicicleta den nos sistema di enseñanza”.

“Tur esaki danki na un acuerdo di cooperacion cu ‘Gemeente Den Haag”, segun Lampe.

- Advertisement -

DUNA COMENTARIO

Please enter your comment!
Please enter your name here