Home Editorial No ta sueldo minimo mester subi pero gobierno mester bira pagabel

No ta sueldo minimo mester subi pero gobierno mester bira pagabel

109
0
SHARE
- Advertisement -

Na e momentonan aki, Aruba ta pasa den momentonan cu nunca e por a pensa cu e lo conoce. Riba tereno local, por papia di un situacion financiero y economico desastroso cu ta menasa pa futuro di nos pais. Riba tereno internacional, ta haya instabilidad y incertidumbre.

Den e situacion aki no por ta posibel cu gobierno ta papia di aumento di sueldo minimo pa trahadonan, cu ta depende di e posibilidad pa nan doño di trabou por paga nan.

Ta facil pa gobernacion dicidi si ta subi sueldo minimo. Hasta si papia di e hecho cu gobierno tambe mester tene su mes na un minimo pa entrada di trahadonan, ta di pueblo e placa pa paga nan mester bini. Ora papia di pueblo y paga, ta papia di e grupo di comunidad cu mester paga belasting pa gobierno haya placa.

Aumenta sueldo minimo na e momento aki ta zona absurdo. Sector priva casi no por para riba su pia mas.  Sigur no, e parti tradicional di sector priva, cu atrobe mester produci fondonan cu e no tin.

Comercio di Aruba ta pasa den situacion hopi preta. E hecho cu Citgo a tranca economia despues cu gobierno anterior a priminti un crecemento economico di 15 porciento, mester por papia pa su mes. Ademas di esaki henter pueblo di Aruba tambe ta victima di e hecho cu  na su despedida, gobierno anterior a entrega Aruba un debe nacional hamas bisto.

Kende ta paga pa e solucion? Pueblo? Di unda placa di pueblo ta bini? Di comercio directamente y indirectamente. Si comercio no tin placa pa paga, ni trahadonan tin sueldo pa kita tur belasting y prima, e resultado  ta cu pais Aruba no tin placa pa paga su trahadonan den gobierno, den parlamento y den husticia cu ta e tres halanan di gobernacion.

Gobierno pues mester tene cuenta cu e situacion di comercio cu ta sumamente malo den un situacion di crisis local y internacional.

Pa ta sincero, ningun hende lo kier ta den e situacion cu gobierno actual a haya su mes cu loke el a hereda. Pero gobierno a acepta di goberna y awor e mester goberna a base di loke pueblo por paga.

Esaki ta encera cu gobierno mester haci su mes pagabel. Cu palabra mas simpel, gobierno mester gasta segun forsa di pueblo, cu ta forsa di produccion comercial di e pais democratico.

Mester scrap e cantidad di biahe cu ta demasiado halto pa e pais. Esaki no solamente pa e Conseho di Minister pero pa Parlamento mientras Husticia tambe mester mira cuanto placa e por gasta menos.

Como ehempel nos ta tuma un gasto di Parlamento. Cantidad di miembro di Parlamento mester biaha pa reunionnan internacional. Ki probecho Aruba tin cu esaki? Kico nos ta gana cu un Parlatino, cu hasta den e crisis di Venezuela tabata e prome pa laba man?

Tin espacio pa baha biahamento cu no ta encera solamente pasashi y hotel, pero hasta zakgeld pa gasta?

Aruba no tin placa. Gobernacion mester adapta su mes na e realidad. Democracia ta exigi esaki.

Ora resulta cu comercio no por paga mas, por spera problema mucho mas grave. Comercio lo mester baha cantidad di personal. Unda trahadonan lo bay traha? Ta hinca nan den gobierno pa bolbe aumenta e gasto di gobierno y belasting? Ta subsidia Citgo pa nan haya trabou sin cu ta conoci mes ken lo ta doño di Citgo mañan? Ta keda sin paga e interes riba e debe nacional pa por paga mas onderstand? Ta exigi Nicolas Maduro pa paga pasobra ta el a origina e crisis regional?

DIARIO a duna y ta duna su sosten na e esfuersonan di gobierno actual pa recupera Aruba di un crisis severo. Tur sosten cu nos duna na cualkier decision di gobernacion, mester ta na interes di Aruba cu actualmente solamente ta wordo sirbi si scrap aumento di sueldo minimo na un momento cu Aruba no tin placa y pa gobierno haci su mes pagabel dor di baha gastonan cu ainda e por baha mescos cu tur empresa priva mester baha nan gastonan pa sobrevivi.

- Advertisement -

DUNA COMENTARIO

Please enter your comment!
Please enter your name here