Home Editorial Nos bienestar y siguridad ta alma di tur ley

Nos bienestar y siguridad ta alma di tur ley

24
0
SHARE
- Advertisement -

Editorial

Un situacion sumamente confuso a surgi ayera pa motibo di yegada di stranheronan na Aruba na un forma cu no por cualifica como bishitante normal.

Pa por presenta un opinion riba e desaroyonan, DIARIO a spera e momento cu di tur instancia a drenta informacion, cu nos a analisa, discuti y midi den su contexto legal pa asina actua di acuerdo cu nos responsabilidad periodistico.

E prome responsabilidad cu DIARIO tin, ta base di su nacemento como matutino di Aruba cu mester sirbi e bienestar di Aruba y ciudadanonan di e pais riba tur cos. Esaki tabata e proposito y lo keda semper nos proposito.

Den e caso cu a desaroya ultimo dianan, nos por ta sumamente corto.

Aruba ta un pais di ley cu no conoce interpretacion of version. Sea ta actua segun ley of ta actua contra ley. Esaki ta conta pa tur hende y tur instancia pa asina sigura cumplimento di nos leynan.

Ley ta conta pa Parlamento, Gobierno y Husticia cu a nace for di nos sistema democratico y ta representa gobernacion constitucional. Ley ta conta pa e Arubiano pero tambe a tur cu drenta nos pais.

Aruba a demostra su solidaridad cu e pueblo Venezolano den e drama humanitario provoca pa Chavismo. E solidaridad di Aruba  habri porta pa situacionnan pa cual Aruba no tabata prepara y pa cual Aruba mester a carga responsabilidad.

Na momento cu Aruba a extende un man di asistencia humano na tur cu a busca auxilio na Aruba, nos a asumi responsabilidad grandi pa cual nos no tabata prepara den un tempo di crisis pisa cu nos ta pasa aden.

Cada persona cu Aruba habri porta pe, ta bira responsabilidad di Aruba un isla chikito, limita na espacio y posibilidad.

Aruba mester tene cuenta cu tur riesgo cu cual e ta confronta su ciudadanonan ora e habri porta pa cualkier persona cu na un forma cu no ta usual y segun ley, ta drenta su pais. Un refugiado no ta drenta e pais na forma normal y mester tene cuenta cu peliger cu ta sconde na su pais di origen manera armanan cu a wordo poni den circulacion dor di su gobierno.

Gobernacion di Aruba cu ta representa den Gobierno, Parlamento y Husticia, mester aplica ley cu ta garantisa bienestar y siguridad di Aruba y e Arubiano.

Den e caso di refugiado ta evita di exigi nan bolbe e scenario inhumano na nan pais. Pero mester sigui regla.

Den e caso aki un pregunta importante a keda atras: “e grupo di stranhero a sigui regla?” Un pregunta cu ta wordo haci dor di bienestar y siguridad di nos pais, cu ta alma di tur ley.

- Advertisement -

DUNA COMENTARIO

Please enter your comment!
Please enter your name here