Home Editorial Nos homenahe na e curason di mama

Nos homenahe na e curason di mama

14
0
SHARE
- Advertisement -

Dia di Mama 2019 ta bati na porta, carga cu retonan grandi pa mama como ser humano. Awe ta momento pa para keto na e cargamento emocional cu a e tarea y e curason di mama ta sconde.

Ora papia di mama, mester tira bista riba Aruba cu a desaroya y bira un pais admira pa mundo pa sacrificionan grandi di muhenan cu curashi, yama mama.

Prome cu e parti femenino a haya oportunidad pa bini dilanti como dirigente, profesional, lider riba diferente tereno na nos pais, su papel mas grandi tabata bini dilanti. E tabata mama y e curason di mama a haya maximo expresion den e temponan mas dificil cu Aruba por a conoce.

Den e temporada prome cu Aruba a wordo industrialisa, hopi cas di Aruba tabata conoce problema serio. Muhenan balente a sostene nan esposo y a lucha pa nan yiunan conoce un futuro diferente.

Cunucunan cu famianan Arubano tabata haci productivo den tempo di secura, por papia di e dolor di mamanan ora campo no por a yena tayo. Na costa, wowonan di mamanan tabata rondia movecionnan cu tabata indica cu piscadonan tabata bolbe sano y salvo y cu alimento cu lama tabata produci.

E mama nunca tabata laga yiunan mira cu e cuminda no a alcansa pa e tambe toca parti. Yiunan tabata wordo prepara pa nan habri caminda pa oportunidadnan nobo.

A bini industrialisacion. A bini cambionan. Algo nunca a cambia. E curason di mamanan cu awe ta confronta e reto di un crisis financiero y economico den un situacion mundial teribel, ta e mes dolor cu ta transforma den animo pa lucha pa bienestar di nan yiunan.

Awe mamanan mester tin formula cu ta funciona pa proteccion di nan yiunan. Mamanan mester tin e balentia di lucha cu recurso financiero na cas pa asina nan yiunan por come, bisti, studia pa bay dilanti. Mamanan mester tin e sentimento grandi di mama pa yena nan yiunan cu balornan y normanan cu lo dicidi pa nan como hende cu mester participa y carga comunidad den futuro.

Mamanan mester convence nan yiunan cu tin futuro y cu nan no mester mira e trampanan di loke por pone nan desvia di exito cu ta warda nan y cu ta e anhelo cu ta cualifica un curason como curason di mama.

Awe nos ta saluda y felicita tur mama na Aruba. E mamanan cu a keda cu e trabou di mama y a haci sosten di nan famia nan unico tarea den bida aunke e participacion di damanan den tur sector di comunidad, ta exigi cantidad di mama entrega nan mes na trabou paden y pafo di cas. Pero e dos esfuersonan aki tin un meta comun: bienestar di e yiu.

Nos ta saluda y felicita tur mama cu ta traha pafo di cas oficialmente y e mamanan cu ta produci articulonan na cas pa asina yuda den e base financiero di nan famia.

Nos ta lanta para pa rindi homenahe na e curason di mama, e curason di comunidad, e curason di tur tempo di Aruba y universo.

Nos ta aplaudi tur cu no ta mama, pero a asumi e papel di mama pa yuda den e necesidad basico di Aruba cu ta amor di mama, e encargo mas grandi cu nos Creador a entrega e ser muhe.

Futuro ta warda cu cambionan grandi cu famia como fundeshi di nos comunidad lo sigura.

Pabien tur mama. Pabien tur famia. Pabien Aruba cu Dia di Mama!

- Advertisement -

DUNA COMENTARIO

Please enter your comment!
Please enter your name here