ORANJESTAD (AAN): E tin basta tempo cera, y ta causa hopi molester specialmente pa trafico cu tur mainta tin di bay direccion Playa. Chauffeurnan tin di bay pega sea den trafico di Tanki Leendert of e trafico di Cumana pa por yega.
Ta trata aki e rotonde cu a wordo traha riba e caminda di Paradera pa Playa, net na comienzo di Sero Patrishi. Aki a wordo construi un rotonde cu yama “Paperclip Rotonde”. Arkitectonan di DOW a wordo obliga di bin cu e tipo di rotonde aki, mirando cu aki en total tin 3 caminda ta desemboca den un punto.
DIARIO a compronde cu riba Diaranzon, e Paperclip Rotonde a wordo habri temporalmente. Corda si cu Watty Vos Boulevard keto bay ta keda cera.
DOW a mustra cu e alegria lo ta temporal, pasobra aki 2 siman lo bolbe cera e rotonde completo pa 5 dia. Esey ta debi cu mester pone e ultimo capa di asfalt. Despues di pone e ultimo capa di asfalt si e rotonde lo keda habri.
