Home Hudicial Pareha Peruano a hit un banco 35 mil Florin cu credit card...

Pareha Peruano a hit un banco 35 mil Florin cu credit card falso

1411
0
SHARE
- Advertisement -

Nan ta keda sera den KIA te dia di nan caso

ORANJESTAD (AAN): Un pareha Peruano actualmente ta sera den KIA pendiente di nan caso penal cu Ministerio Publico a cuminsa contra nan. E pareha a presenta dilanti Hues y Fiscal a bisa cu e caso ta pro forma. A haci palabracion cu tratamento di e caso lo ta na Augustus 2019.

E abogado a pidi Hues pa laga e dama Peruano liber, pero Fiscal a reacciona pidiendo Hues pa laga e muher keda sera. Hues a dicidi cu e pareha ta keda sera te dia di e caso.

   HIT BANCO CU CREDIT CARD FALSO:

E acusacion cu Fiscal a presenta contra e homber C.L. y e muher G.R. ta cu entre 5 y 9 Januari 2019 a usa credit card falso y horta for CMB 35 mil Florin.

Fiscal a bisa Hues cu e caso ta pro forma pasobra no tin lugar riba e schedule di casonan penal. El a pidi Hues pa pospone e caso pa dia 30 Augustus 2019 pa 9.30 di mainta.

    HUES A NENGA PA LAGA DAMA LIBER:

Abogado mr. Carlo a pidi Hues pa suspende e detencion di e muher G.R. El a mustra cu G.R. tin dos yiu na Peru y nan tur dos ta bay tratamento di psycologo. Segun e abogado, G.R. no tabata sa cu tabata usa carchi falso. El a bisa cu C.L. a invita G.R. pa pasa vacacion na Aruba. Na Aruba C.L. a bisa G.R. cu e mester a yuda saca placa cu carchinan. G.R. a rabia y bisa cu e no tin nada di haci cu esaki.

Na opinion di mr. Carlo, no tin motibo di peso pa sigui detene e muher. El a menciona un caso di 68 mil Florin caminda e persona a worde laga liber pendiente di e caso.

E abogado a bisa Hues cu e ta kere cu G.R. lo no haya mas castigo cu loke el a sinta caba. El a sigui bisa cu e ta compronde cu si suspende G.R. su detencion, e lo bay Peru. Por a nota cu mientras cu abogado tabata papia G.R. tabata yora. E abogado a mustra tambe cu Recherche a haya G.R. cu carchi sin nomber. El a splica cu na Peru ta usa carchi sin nomber. E abogado a bisa Hues cu si G.R. bay liber y condon’e, e lo no por bin Aruba pasobra e lo worde sera.

Fiscal tabata contra pa laga G.R. liber. Segun Fiscal, tin video caminda ta mira cu diferente biaha G.R. tabata pin. Fiscal ta haya e caso hopi serio y e ta haya cu e interes di e caso tin cu pisa mas cu e interes di e sospechoso G.R. Fiscal a pidi Hues pa rechaza e peticion di abogado pa laga G.R. liber. G.R. mes a bisa cu e ta arepenti di loke el a haci. El a bisa cu como hende el a haci un fayo. El a pidi pa lag’e liber.

Hues a dicidi cu ta rechaza peticion di abogado pa laga G.R. liber. Hues a pospone e caso pa dia 30 Augustus 2019 pa 8.30 di mainta. Hues ta haya cu e interes di e caso ta pisa mas cu e interes di G.R. El a bisa cu G.R. mester a pensa promer cu el a haci esaki.

- Advertisement -

DUNA COMENTARIO

Please enter your comment!
Please enter your name here