Home Transporte y Utilidadnan Pasahero a bira malo net ora avion Aruba Airlines a declara emergencia

Pasahero a bira malo net ora avion Aruba Airlines a declara emergencia

690
0
SHARE
— Aki por mira con e avion a haci un hold-pattern pabao di Curacao.
- Advertisement -

ORANJESTAD (AAN): Tabata Diahuebs atardi alrededor di 2:31 pm, cu e vuelo di Aruba Airlines, esta ARU-502 a lanta vuelo for di pista 11 di Hato International Airport na Curacao, riba su ruta chikito di 30 minuut mas o menos pa Aruba.

Sinembargo algun minuut despues di a haci su birada pa bay direccion west, pilotonan a nota cu tin un problema cu Motor #1 di e avion jet Bombardier CRJ-200, cu tin 33 persona abordo.

Aunke e avion ta diseña pa keda bula normal cu un solo motor cendi, toch e procedimento ta pone cu e Capitan tin di busca forma pa ateriza lo mas pronto posible.

Inmediatamente a comunica cu Toren di Control cu nan ta rekeri vectors pa asina regresa y baha bek riba pista 11 di Curacao.

Segun e portal Flightaware cu ta track vuelonan, e avion a lanta vuelo, y ya den 1 minuut a yega te na maximo 2.600 pia di altura, mientras cu nan tabata birando panort di Aeropuerto.  Aki ta unda cu nan a ripara cu tin problema cu e motor, y na di 2 minuut ya caba a cuminza baha na 2.500 pia y reduci velocidad.  Na di tres minuut, e avion a baha bek te na 2.100 pia.  Na di cuatro minuut nan a baha bek te na 1.800 pia.

En preparacion pa e aterizahe, nan a pidi algun momento extra pa nan haci preparacion, y tambe a haya OK pa haci un vuelo circular pabao di e isla di Curacao.  E ora nan a logra subi bek te na 2000 pia.

   PASAHERO BIRA MALO:
Sinembargo ora cu e personal di cabina a informa e pasaheronan cu e avion tin di haci un aterizahe bek na Curacao debi cu un motor a cay afo, esaki lo a afecta e nervio y duna un pasahero extra spanto.

Prensa di Curacao a informa, cu e pasahero femenino aki posiblemente su presion di sanger a bay asina halto, y a cuminza bira malo.  A pidi Toren di Control pa manda un Ambulans tambe pa ora nan ateriza, pa atende e pasahero.

E avion CRJ-200 a haci un solo vuelta pabao di Curacao, y asina a posiciona su mes bek pa final-approach.  Como 20 minuut despues cu el a lanta vuelo, e avion a ateriza na Curacao.  Crash Trucks di Curacao Hato Airport tabata riba standby a lo largo di pista y tambe riba plataforma.

Como cu Aeropuerto a wordo cera e momento ey, e vuelo di KLM cu mester a sali algun rato despues a haye obliga na keda warda.  Un Boeing 737 di American Airlines cu tabata yegando for di Curacao, a keda circula pabao di Curacao pa varios rato, te ora cu e pista a habri bek.  E avion di KLM a lanta vuelo prome, y despues e American Airlines por a baha.

Despues di a caba di baha, e avion a sali for di pista y a keda para un banda, pa asina Bomberonan por a check si acaso tin algo inusual cu e avion.  Ora cu a notifica na e Piloto cu tin nada inusual, e avion a hala mas dilanti para na e plataforma, y aki Ambulans a yega pa asina busca e pasahero femenino, y a pone den e vehiculo pa asina check su signonan vital, y dune remedi cu por a stabiliza su presion di sanger.

Pilotonan y e Mecaniconan a bay revisa kico a pasa cu e Motor #1 di e avion.

E avion Bombardier CRJ-200 aki cu Aruba Airlines ta usando actualmente riba e ruta regional, tin como 20 pico aña bulando.  Su prome vuelo tabata na Januari 1999.

- Advertisement -

DUNA COMENTARIO

Please enter your comment!
Please enter your name here