Home Parlamento Pueblo tin derecho di ricibi ‘reparatietoeslag-BBO’ for di Gobierno

Pueblo tin derecho di ricibi ‘reparatietoeslag-BBO’ for di Gobierno

31
0
SHARE
- Advertisement -

Parlamentario Marlon Sneek

ORANJESTAD (AAN): Gabinete Wever Croes a tuma un serie di medida contra pueblo hincando man den cartera di tur hende, pa financia su maneho cu mas tanto ta di duna back na sponsornan di campaña y sostenedonan di partidonan.

Lider di fraccion di AVP, sr Marlon Sneek ta mustra cu pa loke ta 2019, gobierno tin presupuesta un entrada di 270 Florin adicional a base di medidanan cu gobierno a tuma contra pueblo, rancando placa sin misericordia for di pueblo, perhudicando cantidad di famia cu no a sperfa esaki di un gobierno cu a priminti pueblo, prosperidad y un  bida sin medida.

“Dianan ta pasa bay, gobierno ta sigui conta storianan cu no ta sirbi interes di pueblo, cu no ta duna pueblo algo extra den su cartera pero ta sigui ranca placa, sigui exigi mas di pueblo cu pretextonan cu no tin sentido.

Ya caba a keda desbarata pa diferente instancia cu ningun momento aumento di BBO tabata pa paga debe di e pais, pero si pa financia maneho di un gobierno cu ta gobernando pa amigo- y famianan.

No ta pasa un solo dia c’un  tin hende ta kehando di nan situacion financiero, di e inflacion grandi cu nan ta confrontando y cuanto problema financiero nan ta hayando pa e falta di vision y falta di capacidad di un gobierno cu a gaña pueblo pa yega na poder.

Un gobierno cu a priminti di goberna sin medida, a transforma su mes den un di e gobiernonan cu mas medida a suta pueblo cune, mientras cu pueblo no ta ricibiendo net nada di e maneho di e gobierno aki.

Nos por a scucha prome minister y minister di finansa papia di sacrificio cu mester worde haci, cu awor ta e momento pa para hunto pa drecha e situacion financiero pero ora cu mira cuanto famia y amigonan nan situacion financiero a bay dilanti, ta dificil pa acepta cu e gobierno aki tin integridad manera e ta pretende.

Dentro di dos luna pueblo lo worde confronta cu e di dos pakete di reformacion fiscal cu lo duna gobierno un 270 miyon extra na final di cuenta y gobierno ta pretende cu a duna pueblo 16 miyon back door c’un grupo lo no paga loonbelasting mas.

Sinembargo di otro banda pueblo tin cu paga 14.5 miyon na aumento di grondbelasting pues practicamente pueblo no a bay dilanti y awor lo worde confronta c’un impuesto adicional di 40 miyon cu practicamente tin cu worde cobra ainda dentro di dos luna.

Economia di e pais ta den crisis y esaki a worde confirma caba pa Banco Central, cu a mustra cu e  pais ta den un recesion economico pa algun luna caba, sin cu gobierno ta haciendo algo pa drecha e situacion aki.

Despues di mas di un aña y mei den gobernacion,  a presenta un plan economico nobo, un plan cu ainda pueblo no sa su contenido y ningun hende sa kico ta bentaha cu pueblo lo bay saca di e plan aki.

Hecho ta cu inversionistanan y comercientenan ya no tin confianza den e plan di goberncion di gabinete Wever Croes, ya cu e poder di compra di henter comunidad a worde afecta  y influencia den un forma asina negativo, cu ta resta practicamente ningun espacio pa haci algo extra cu tur e medidanan cu pueblo tin cu paga tur fin di luna.

Partido AVP semper a percura pa alivia e peso di esunnan cu entrada abou, esunnan di mas necesidad di haya un tiki espacio pa haci algo extra y tur loke gabinete Wever Croes ta dunando pueblo na e momentonan aki, ta loke gobierno di AVP ya caba a duna pueblo for di 2009  bin dilanti.

Na e momentonan aki mester institui un reparatietoeslag BBO mas pronto posibel pa asina pueblo por haya un alivio contra e medidanan cu e aumento di BBO di gabinete Wever Croes a ocasiona y tin cu busca otro solucionnan pa asina pueblo haya un alivio di e abusonan cu e gobierno actual a bin ta ocasionando y cu nan lo sigui ocasiona den lunanan nos dilanti,” lider di fraccion di AVP, Marlon Sneek ta mustra.

 

- Advertisement -

DUNA COMENTARIO

Please enter your comment!
Please enter your name here