Home Parlamento Reapertura di refineria ta worde sacrifica pa scapa Gobierno di Coalicion

Reapertura di refineria ta worde sacrifica pa scapa Gobierno di Coalicion

53
0
SHARE
- Advertisement -

Parlamentario Mike de Meza:

ORANJESTAD (AAN): Na opinion di Parlamentario Mike de Meza di AVP, for di prome dia cu gabinete Wever Croes a worde forma tabata bisto cu e proyecto importante pa economia di pais Aruba, e refineria na San Nicolas, lo no mira luz di dia ya c’un di e partnernan di e coalicion MEPPORRED, a dicidi cu esaki no ta su interes personal y partidista.

Continuacion di e proyecto importante aki, ta mishi cu interes di e lider di partido POR, kende ya caba a compromete su mes cu inversionistanan pa un proyecto hotelero na San Nicolas y pa tal motibo centenares di tata y mama di famia, tin cu bay cas y pais perde miyones na entradanan.

Miembro di fraccion di AVP, ing Mike de Meza a mustra cu gobierno ya caba no a negociando pa salba e proyecto aki y a bay over na hasta inventa weganan sushi  caminda entre otro prome minister ta presta su mes pa lansa acusacionnan falso y baho relaciona cu fondonan cu a desaparece.

“Ta tristo ora cu nos mira un prome minister kende durante di henter e proceso pa haya companianan internacional pa habri e refineria na San Nicolas, pretende cu e tin cantidad di gruponan cu ta interesa den e refineria pero awendia di repente tur e companianan a core limpi bay laga Evelyn atras.

Diripiente portanan cu ta habri pa Evelyn cu no tabata habri pa Mike Eman, a dal porta cera y no kier tin nada di haber cu prome minister di Aruba pero simplamente aki pueblo ta haya su mes confronta cu otro mentira flagrante di e prome mandatario.

Loke ta bon pa pueblo  realisa den e desaroyonan aki entorno e proyecto di reapertura di e refineria, ta e hecho cu prome minister a scoge pa su interes propio, pa e interes di su partido riba e interes di pueblo di Aruba.

Evelyn ta scoge pa bira prome minister y pa por a logra esaki e mester a drenta un matrimonio politico c’un lider politico cu semper el a acusa di ta corupto, di ta abusado y di ta meti den asuntonan cu no ta corecto.

Tur hende por corda ainda con a referi na su actual minister Otmar Oduber, como un ‘tal Otmar’ a acuse di ta meti den un proyecto corupto di strawberry, a entrega documentonan na Minister Publico pa crimennan cometi pa su minister awe.

Ta bisto pa tur hende cu coalicion MEPPORRED tin Evelyne como prome minister pero doño di e gobierno aki ta e mesun tal Otmar aki, kende ta manipula y haci loke cu e kier cu su partner mas grandi cu ta partido MEP.

Na varios ocasion esaki a worde confirma cabal, esta cu si no ta haci loke minister Oduber ta haci, gabinete Wever Croes ta bay cas y lo no tin gobierno mas y den e sistema aki  ta bisto cu e proyecto di reapertura di refineria na San Nicolas, ta e proyecto cu tin cu worde sacrifica pa asina minister Oduber logra su meta.

Ta for di tempo cu e tabata minister caba den gabinete Mike Eman, e tal Otmar a rabia na momento cu gobierno di AVP a dicidi di sigui cu e proyecto di reapertura di e refineria y ta un decision cu a habri caminda pa e bandona partido AVP.

Awendia e mensahe di e tal Otmar aki tabata bon cla, ya cu si e no logra cumpli cu e proyecto di un hotel ‘all inclusive’ na San Nicolas, lo no tin mas gobierno di coalicion y su partner grandi a cay pa e exigencia aki y esaki ta worde confirma pa e forma con gobierno ta atendiendo cu oficialnan halto di CITGO pa mas c’un aña caba.

E comedia cu ta worde hunga ta bisto y no tin esfuerso cu ta worde haci pa e gobierno aki pa trata di scapa e proyecto di refineria, cu lo duna un boost enorma na economia di nos pais pero ta prefera di manda centenares di tata y mama di famia cas, pa sirbi interes di un lider minoritaria manera e tal Otmar aki.

Mientras tanto tin cantidad di informacion mustrando cu financiadonan di campaña electoral ta esunnan cu ta defeni e rumbo cu e gobierno di Evelyne tin cu bay, esta di sirbi interes di e sponsornan di campaña, lagando pueblo su interes totalmente un banda.

Ta un realidad cu si sigui cu e refineria lo no tin coalicion mas y prome minister y otro ministernan di e coalicion aki, a scoge pa nan saco, pa saco di nan amigo y famia, pa interes di sponsornan di campaña,” Parlamentario Mike de Meza a mustra.

 

- Advertisement -

DUNA COMENTARIO

Please enter your comment!
Please enter your name here