Prome Minister Evelyn Wever-Croes
ORANJESTAD (AAN): Prome Minister Evelyn Wever-Croes a elabora riba diferente topico durante conferencia di prensa semanal di Gobierno. E biaha aki el a papia tocante peticionnan pa asilo politico y Citgo.
Pa loke ta trata refineria, e mandatario a bisa cu manera el a anuncia algun siman pasa, di parti di embahada di Reino na Washington, nan ta organizando loke nan ta yama un “joint mission” na unda Prome Minister di Corsow y su persona lo acompaña embahador di Reino pa atende algun reunion cu lo tuma lugar na Washington.
E viahe lo tuma lugar dialuna y diamars venidero y riba nan agenda tin varios reunion cu tin e refineria como tema central y impacto di crisis di Venezuela riba Aruba. Nan lo reuni cu funcionarionan di Departamento di Estado y OFAC (office of foreign assets control) cu ta atende cu e sancionnan, y nan lo purba pa trece dilanti un biaha mas e importancia di refinerianan pa economianan di e paisnan. Den opinion di Prome Minister, e lo ta un di e ultimo intentonan cu nan lo haci pa purba di scapa e refineria, pasobra cosnan ta mustra hopi dificil.
E mandatario a indica cu nan tambe lo tene reunionnan na Capitol Hill cu varios congresista, pa asina enfatiza importancia di impacto di refineria riba nos economia, pero tambe pa discuti e crisis migratorio cu tin na Venezuela y su impacto pa Aruba. E importancia di esaki ta pa nan realiza cu cada decision cu nan ta tuma na Washington, tin su impacto riba islanan chikito manera Aruba, pero sumamente significante.
Aparte di esey, nan tambe lo tene algun encuentro cu IMF y World Bank tambe riba tema di impacto di Venezuela, pa mira con Aruba por bin na remarca pa mas fondonan pa por yuda nos den esaki. Nan tin riba agenda algun orientacion economico pa atrae inversionistanan pa Aruba. Nan ta bay presenta nan vision economico y pilarnan economico cu nan ta bay promove pa atrae inversionistanan. E reunionnan aki lo tuma lugar dialuna y diamars, y diaranzon e Prome Minister lo ta bek na Aruba, y e ta spera di por trece bon noticianan.
Pa loke ta trata tema di refineria, Prome Minister a bisa cu esaki ta keda un tema delicado den comunidad, cada biaha e chens ta mustra mas scur, manera el a bisa algun siman pasa cu e problema ta serio, cada dia esaki ta birando mas serio, y esaki ta algo cu e ta lamenta profundamente.
E mandatario a bisa cu el a tuma nota di oponientenan cu ta purba di bira esaki na un manera of otro cu ta mustra cu nan no tin interes pa habri e refineria. Prome nan a bisa cu nan tin mas interes riba cannabis cu den refineria, despues nan a bisa cu nan tin mas interes den hotel cu refineria, y Prome Minister ta kere ta importante pa pone un “bottom line” riba e situacion, nan a drenta gobierno cu un refineria cera, y desde prome dia nan ta haciendo tur nan esfuerzo pa purba habri e refineria. E refineria ta cera no desde cu nan a drenta gobierno, e ta cera desde 2013, kiermen cu esaki tabatin 4 aña cera prome cu nan a drenta gobierno. E ta enfatiza cu oposicion no por bisa cu e no ta esun cu no kier habri’e, pero nan tampoco a logra habri e refineria durante nan maneho.
E mandatario a indica cu importancia di refineria pa Aruba ta asina grandi, cu no ta algo pa haci politica barata cune. Como gobierno nan esfuerzonan ta pa rescata e refineria, pasobra nan ta tene na cuenta cu e mama y tatanan di famia cu ta traha eynan. Nan a purba di tur angulo pa acerca yega na un solucion, pero a yega un punto cu Prome Ministernan mes ta bay te Merca pa bay atende e tema aki, y tur esfuerzo ta wordo haci pa sea yega na un apertura of un solucion di e situacion di e refineria.
El a expresa cu no necesariamente nan lo keda cu Citgo. Relacion di Gobierno cu Citgo ta hopi malo, nunca e relacion aki mester a bin riba pia, si por wak e situacion actual. Citgo no ta un partner confiable, nan no a tene nan mes na ningun palabracion, ni cu gobierno anterior ni cu gobierno actual. Loke nan ta purbando cu Citgo ta cera capitulo aki y sali for di e contract, nan no ta asina leu ainda, abogadonan ta bezig cu e caminda aki, pero den mesun momento nan kier traha pa wak si tin un espacio pa sigui desaroya un refineria den futuro cu otro operador. Si esaki no ta posibel, nan mester bay bek, manera nan a palabra den nan acuerdonan di gobernacion, pa bay acerca comunidad y dicidi conhuntamente kico Aruba kier. Un Aruba cu refineria of un Aruba sin refineria. Pero den momentonan aki tur esfuerzo ta wordo haci pa habri e refineria pasobra esey ta loke nan a palabra y esey ta loke nan ta haciendo.
