Home Gobierno Roland de Cuba a bira Director General nobo di Parke Nacional Aruba

Roland de Cuba a bira Director General nobo di Parke Nacional Aruba

31
0
SHARE
- Advertisement -

ORANJESTAD (AAN): Fundacion Parke Nacional Aruba un vez mas a tuma un paso significante den cuadro di profesionalisacion di su organizacion. Effectivo dia prome di mei 2019, miembronan di Conseho di Supervision a nombra un director general nobo: Roland de Cuba.

   Roland de Cuba awor, hunto cu Director di Conservacion, Natasha Silva, ta forma directiva di FPNA.  Nan lo ta encarga cu maneho diario di e fundacion.

Na mes momento tambe Starr Ramos, e Marketing & Communication Manager y Tyson Lopez, e Sustainable Recreation Manager nobo a drenta servicio di FPNA.
Cu e nombramentonan aki directiva y e team di maneho di FPNA finalmente ta completo y por cuminsa traha di un manera eficiente ariba conservacion di naturalesa den e areanan cu ta bou di maneho di e fundacion.

Como director general señor De Cuba lo dedica su mes principalmente na e maneho general di e fundacion. Esey ta encera cu conhuntamente cu e Director di Conservacion lo bay traha duro ariba profesionalisacion di e organizacion.  FPNA ta un organizacion cu pa nos Pais, actualmente tin areanan di naturalesa bou di su cuido di alrededor di 20% di e superficie di Aruba ademas di un parke maritimo.

Adicionalmente Roland de Cuba lo ta encarga tanto cu renobacion di edificio- y camindanan di Parke Arikok como optimalisacion di fluho di bishitante. Di prioridad halto ta tambe e negociacionan pa un contrato collectivo pa trahadornan; en particular restructuracion organizacional y desaroyo di un structura di funcion y di compensacion. Un otro tarea De Cuba ta encarga cu ne ta compila o actualisa plannan di maneho pa e diferente parke y area natural bou di maneho di FPNA .

Conseho di Supervision di FPNA ta sumamente contento cu nombramento di e tres profesionalnan aki y ta convenci cu tur tres lo aporta significantemente na profesionalisacion, bien estar di empleado y particularmente cuido y conservacion di naturalesa na Aruba.

   ROLAND DE CUBA:

Roland de Cuba, naci na Aruba den aña 1962, ta ex-alumno di Ir. Cesare Terzano MTS. De Cuba a sirbi como zeemiliciën cu ANTMIL na Aruba y como marinier cu United States Marine Corps.

Sr. De Cuba a gradua di Southeastern University na Washington, DC cu un BSc den Accounting y Taxatation. Durante su carera profesional el a traha den differente funcion financiero y di maneho na Merca, Hulanda y Corsow.  Na 2012, Roland de Cuba a bolbe Aruba. Sr. De Cuba a traha como Secretaris di Controlaria General di Aruba.

- Advertisement -

DUNA COMENTARIO

Please enter your comment!
Please enter your name here