ORANJESTAD(AAN): Diamars mainta Orlando Hoevertsz, presidente di Soccer Education Center Aruba (SECA) a anuncia cu SECA a cera un alianza cu e actual campeon di futbol di Hulanda PSV di Eindhoven.
El a splica cu durante e proximo temporada di vakantie grandi lo tin un di e mihor eventonan pa tur mucha homber y muher entre 6 pa 18 aña na Aruba.
Ta trata di e promer Soccer Camp cu ta wordo organiza door di PSV y SECA, cu lo tuma lugar di 8 di Juli pa 11 di Juli na Compleho Deportivo Frans Figaroa.
“Manera boso sa, PSV ta un di e mihor clubnan di futbol na Hulanda, cu den Europa a yega di logra exito tambe”.
“E club sigur den ultimo añanan ta conoci pa tin un hopi bon opleiding hubenil (farm system), unda cu nan a produci varios hopi bon hungador”.
“Nos ta super contento, pasobra PSV ta e club unda cu nos super strea Arubiano Denzel Dumfries ta hungando”.
Esaki segun Hoevertsz, kende a sigui bisa cu PSV tin hopi otro bon hungador tambe.
El a splica cu PSV lo manda dos coach profesional di nan opleiding hubenil pa Aruba na Juli, pa nan train e muchanan cu ta bay participa na e camp.
E training ta bay ta na e mesun estilo profesional cu na ta hasi na Eindhoven.
E veld grandi ta bay wordo parti den 5 veld chikito cu ta bay tin 12 pa 15 hungador.
Pa cada veld ta bay tin tambe 2 coach di SECA cu ta bay ta e coachnan asistente pa esunnan di PSV.
E intencion ta pa train e muchanan entre otro con pa mehora nan tecnica den areanan specifico, pa nan progreso y crecemento como futbolista.
Pa inscripcion por tuma contact cu Richard Charles na 568-3406 (tambe via whatsApp) of via email na secaaruba@gmail.com.
