ORANJESTAD(AAN): Na Juli ta bay tuma lugar un Soccer Camp organiza pa Soccer Education Center Aruba (SECA) y PSV, cu a yega na un acuerdo pa traha hunto.
E Soccer Camp ta bay ta di dia 8 te cu 11 di Juli y durante un conferencia di prensa Marva Groeneveld di bestuur di SECA a splica cu un di su tareanan den SECA ta e parti di educacion.
“Pa loke ta trata e parti di educacion, nos ta organizando diferente charla pa e muchanan pasobra ta bon pa bo tin un bon educacion cu bo por cay bek riba dje”.
“Te ainda nos a organiza un charla cu a wordo duna pa ex basebolista di Major League Eugene Kingsale y den su Charla el a enfoca hopi riba disciplina y perseverancia”.
Esaki segun Groeneveld, kende a sigui bisa cu Kingsale a indica cu el a yega leu door di disciplina y perseverancia.
“Tin biaha bo ta kere cu quizas bo no ta bay logra, pero bo tin cu sigui kere den bo mes y bo lo ripara cu na dado momento bo ta logra”.
Esaki segun Groeneveld, kende a indica cu e siman aki SECA ta organiza un charla cu Ronald Staring, kende ta bay duna un splicacion amplio di e reglanan di futbol, pasobra apesar cu tin varios mucha talentoso, ainda tin diferente di nan cu no sa tur e reglanan.
Specialmente e muchanan mas hoben.
E intencion ta tambe pa invita un terapeuta fisico pa duna muchanan un splicacion riba kico tur tin cu wordo hasi ora cu nan haya un lesion.
SECA tin pensa tambe pa laga un dietista duna un charla riba e importancia di nutricion.
Na Aruba esaki ta hopi importante, pasobra tin varios mucha cu gusta fast food y ta sobrepeso.
